कैलाली । सुदूरपश्चिम प्रदेशका मुख्यमन्त्री कमलबहादुर शाहले वर्तमान व्यवस्थाको सफल कार्यान्वयन र प्राप्त उपलब्धिको रक्षाका लागि सबै एकजुट हुनुपर्ने बताएका छन् । कैलालीको बर्दगोरियामा निर्माण भएको १५ शैयाको ‘दोदोधरा आधारभूत अस्पताल’ को उद्घाटन गर्दे मुख्यमन्त्री शाहले निर्वाचित जनप्रतिधि जनताप्रति जनउत्तरदायी हुनुपर्ने बताए । देशका लागि आहुती दिने सहीदका सपनाहरु साकार गर्ने सन्दर्भमा मुलुकमा संघीयता, लोकतन्त्र, गणतन्त्र आएको उल्लेख गर्दे उनले यसको रक्षा र कार्यान्वयनका लागि सबै एकजुट हुनुपर्ने बताए । ‘तपाई हाम्रा हकअधिकार स्थापित गर्ने क्रममा लोकतन्त्र, गणतन्त्र र संघीयता आयो । मुलुकमा अगाडी बढ्यो तर, कतै तपाई हाम्रा क्रियाकलापले हामीलाई कमजोर बनाउँदै त छैन?’ उनले भने, समग्र व्यवस्था फेल हुने त होइन भन्नेतर्फ सचेत जरुरी छ ।
उनले ईमानदारिताका साथ हिजो गरेका बाचाहरु पूरा गर्न नसके सबैको दुर्भाग्य हुने बताए । सरकारले लिएका कतिपयले आयोजना, नीति तथा कार्यक्रम पूर्णता नपाएको अवस्थामा बर्दगोरिया गाउँपालिकाले समयमै अस्पताल भवनको निर्माण आयोजना सम्पन्न गर्ने अवधिभन्दा अगावै निर्माण सम्पन्न गरेको भन्दै मुख्यमन्त्री शाहले धन्यवाद दिए । सो अवसरमा उनले सुदूरपश्चिम प्रदेशको समग्र स्वास्थ्य क्षेत्रको विकास गर्न सरकार प्रतिबद्ध रहेको बताए । उनले सुदूरपश्चिम प्रदेश सरकारले स्वास्थ्य सुधार गर्न नीतिगत रुपमा निर्णय गरेर अघि बढ्न सरकारले समिति गठन गरि काम प्रारम्भ गरेको समेत बताए । मुख्यमन्त्री शाहले बर्दगोरिया आधारभूत अस्पतालका लागि आवश्यक सबै उपकरणको व्यवस्था मिलाउने आश्वासन दिए । 
उनले भने, ‘म तपाईहरुलाई विश्वास दिलाउन चाहान्छु, यो अस्पतालभित्र चाहिने औजार, मेसिनका सन्दर्भमा कसैसँग हार गुहार गर्नु पर्दैन त्यो सबै प्रदेश सरकारले नै गर्नेछ ।’ सो अवसरमा बर्दगोरिया गाउँपालिका अध्यक्ष कर्णबहादुर कुँवरले बर्दगोरियामा कसरी निशुल्क स्वास्थ्य र शिक्षाको पहुँच जनतामा पुर्याउने भन्ने लक्ष्यका साथ अघि बढेको बताए । ‘एकवर्षभित्र गाउँपालिकाका जनतालाई कसरी स्वास्थ्य औषधी उपचारको सुविधा दिने विषयका हामी छलफलमा छौँ’ उनले भने, कसरी जनतालाई गुणस्तरीय सेवासुविधा दिन सकिन्छ भन्नेमा केन्द्रित छौँ । सो अवसरमा उनले सबैको सहयोगले अस्पताल सञ्चालनमा ल्याउन सफल भएकोमा धन्यवाद समेत दिए ।
