कैलाली । कैलाली जिल्लाको बर्दगोरिया गाउँपालिकालाई नेपाल रेडक्रस सोसाइटीले रगत उपलब्ध गराउने भएको छ । जिल्ला शाखा कैलालीले निःशुल्क रगत उपलब्ध गराउने सम्झौता गरेपछि रगत अभावबाट हुने मानवीय जोखिम कम हुने गाउँपालिकाले विश्वास लिएको छ । शुक्रवार बर्दगोरिया गाउँपालिकाले आफ्ना नागरिकहरुको लागि स्वास्थ्य उपचारमा रगत अभाव हुन नदिने भन्दै गाउँपालिका र नेपाल रेडक्रस सोसाइटी जिल्ला शाखाबीच निःशुल्क रगत उपलब्ध गराउने सम्झौता गरेको छ ।
निःशुल्क रगत उपलब्ध गराउनका लागि पालिका अध्यक्ष कर्ण बहादुर कुँवरले गाउँवासी कोही बिरामी परेर रगत नै चाहिएको अवस्थामा निशुल्क उपलब्ध गराउने उद्देश्यले रेडक्रसलाई रकम प्रदान गरिएको अध्यक्ष कुँवरले जानकारी दिए ।
बर्दगोरियाका बासिन्दाले अबका दिनमा रगत चाहिएमा शुल्क तिर्नुपर्दैन । पहिचान पत्र लिएर ब्लड बैंक पुगे हुन्छ,’ उनले भने, ‘आकस्मिक समस्या पर्दा थोरै भएपनि राहत होस भनेर निःशुल्क रगतको बन्दोबस्ती मिलाएको हुँ ।’
गाउँपालिका र रेडक्रस सोसाइटीबीच २०८० फागुनदेखि २०८१ आषाढ मसान्तसम्म निःशुल्क रगत उपलब्ध गराउने सम्झौता भएको रेडक्रस जिल्ला शाखा सभापति बासुदेव बिनाडीले बताए । आवश्यकता हेरेर रक्तदान कार्यक्रम संचालन गर्नेगरी सम्झौता भएको छ । गाउँपालिका नगरिकहरुलाई जुनसुकै प्रकृतिका बिरामीहरुलाई निःशुल्क रगत उपब्लध गराउने गरी काम गरिने बिनाडीले बताए ।
