कैलाली । दैलेख जिल्लामा २०२९ सालमा जन्मिएका लिलाजंग शाही २०३० सालदेखि कैलालीको साबिक सुगरखाल–६ मा बसाइँसराइ गरी हाल लम्कीचुहा नगरपालिका–६ मा स्थायी रूपमा बसोबास गर्दै आइरहेका छन् । नेपालमा बहुदलीय प्रजातन्त्र पुनःस्थापना भएसँगै २०४७ साल जेठ २ गते नेकपा एमालेको साधारण सदस्यता लिएर सक्रिय राजनीतिमा प्रवेश गरेका शाही २०५५ सालदेखि पार्टीको संगठित सदस्यका रूपमा क्रियाशील रहँदै आएका छन् ।
राजनीतिक यात्रामा अनुभवी शाही २०५४ सालको स्थानीय निकाय निर्वाचनमा साबिक सुगरखाल–६ बाट निर्वाचित भएका थिए । त्यसपछि २०६३ सालदेखि साबिक चुहा गाविस गाउँकमिटी सचिवको जिम्मेवारी सम्हाल्दै पार्टी संगठन सुदृढीकरणमा उल्लेखनीय योगदान दिएका छन् ।
पत्रकारितामा समेत सशक्त पहिचान बनाएका शाहीले २०६३ सालमा लम्कीबाट प्रकाशित पश्चिम आवाज साप्ताहिकबाट पत्रकारिता यात्रा सुरु गरेका हुन् । त्यसयता टिकापुर दैनिक, हटलाइन दैनिक, सुदूर सन्देश दैनिक, अनुमोदन दैनिक हुँदै २०७० सालदेखि कोसेली एफएम का प्रबन्ध निर्देशकका रूपमा कार्यरत छन् ।
२०६३ सालदेखि प्रेस चौतारी नेपालमा आबद्ध शाही २०६४ मा जिल्ला कमिटी सदस्य र २०६७ मा जिल्ला कमिटी सचिव बनेका थिए । उनी नेपाल पत्रकार महासंघ कैलाली जिल्ला कार्यसमिति सदस्य, सेती अञ्चल समन्वय समिति सदस्य, प्रदेश सभा सदस्य हुँदै हाल केन्द्रीय परिषद सदस्यको जिम्मेवारीमा छन् । साथै बौनिया जेसीजका संस्थापक अध्यक्षसमेत रहेका शाही २०६२ देखि २०७१ सालसम्म कृष्ण माध्यमिक विद्यालय लम्कीचुहा–६ बाघमारामा शिक्षकका रूपमा पनि सेवा गरेका छन् ।
२०७८ सालमा सुदूरपश्चिम प्रदेश कमिटी सचिवालय सदस्य, केन्द्रीय कमिटी सदस्य तथा केन्द्रीय लेखा आयोग सदस्यको भूमिका निर्वाह गरिसकेका शाही हाल नेपाल बुद्धिजीवी परिषद् सुदूरपश्चिम प्रदेश कमिटी सदस्यका रूपमा सक्रिय छन् ।
विकास निर्माण, समाज रूपान्तरण र श्रमजीवी पत्रकारको हकहितका पक्षमा निरन्तर क्रियाशील रहँदै आएका शाही पार्टी निर्माण कार्यमा पनि निःस्वार्थ भावनाका साथ समर्पित रहँदै आएका नेता हुन् । यही योगदानको कदर गर्दै नेकपा एमाले कैलाली क्षेत्र नं. २ बाट उनलाई समानुपातिक सांसदमा सिफारिस गरिएको छ ।
कैलाली क्षेत्र नं. २ का जनतामाझ लोकप्रिय रहेका शाहीलाई यसपटक समानुपातिक सांसदका रूपमा अवसर दिएर पार्टीले न्याय गर्नुपर्ने मागसमेत उठ्न थालेको छ । संगठन निर्माणदेखि प्रेस चौतारी नेपाल र सुदूरपश्चिम प्रदेशको पत्रकार आन्दोलनसम्म शाहीको भूमिका प्रभावकारी रहेको पार्टीभित्र व्यापक चर्चा छ ।
