कैलाली । कैलाली जिल्लाको बर्दगोरिया गाउँपालिका वडा नं. ३ रानीकुण्डामा मुक्त कमैया परिवारका लागि निर्माण गरिएको २१ वटा सुरक्षित आवास समुदायलाई हस्तान्तरण गरिएको छ। सुदूरपश्चिम प्रदेश सरकारको भूमि व्यवस्था, कृषि तथा सहकारी मन्त्रालय, बर्दगोरिया गाउँपालिका र Habitat for Humanity Nepal को सहकार्य तथा राष्ट्रिय दलित नेटवर्क नेपालको सामाजिक परिचालनमा निर्माण कार्य सम्पन्न भएपछि आवास हस्तान्तरण गरिएको हो।
कार्यक्रमका प्रमुख अतिथि भूमि व्यवस्था, कृषि तथा सहकारी मन्त्री वीरबहादुर थापाले सुरक्षित आवास प्राप्त भएपछि मुक्त कमैया परिवारको जीवनमा स्थायित्व र आत्मसम्मान बढ्ने विश्वास व्यक्त गर्नुभयो। उहाँले सरकारले विपन्न तथा भूमिहीन समुदायको आवास समस्या समाधानलाई प्राथमिकतामा राखेको उल्लेख गर्नुभयो।
विशिष्ट अतिथि पूर्वमन्त्री रामेश्वर चौधरीले यस्ता कार्यक्रमले सामाजिक न्याय र समानताको दिशामा सकारात्मक प्रभाव पार्ने बताउँदै यस्ता अभियानलाई निरन्तरता दिनुपर्ने धारणा राख्नुभयो।
गाउँपालिका अध्यक्ष कर्ण बहादुर कुँवरले स्थानीय सरकार र प्रदेश सरकार बीचको सहकार्यले मात्रै यस्ता उपलब्धि सम्भव भएको बताउँदै आगामी दिनमा पनि विपन्न तथा लक्षित समुदायका लागि कार्यक्रमलाई निरन्तरता दिइने बताए ।
कुल १ करोड ४७ लाख ६९ हजार ५ सय ३४ रुपैयाँ २६ पैसाको लागतमा निर्माण भएका २१ घरमध्ये मन्त्रालय र गाउँपालिकाको संयुक्त लगानी ७१ लाख ३४ हजार, Habitat for Humanity Nepal तथा राष्ट्रिय दलित नेटवर्क नेपालको ५२ लाख ५० हजार र समुदायको जनश्रमदान २३ लाख ३५ हजार ५ सय ३४ रुपैयाँ रहेको छ।
निर्मित आवासबाट १ सय २६ जना लाभान्वित भएका छन्। २०८२ वैशाखमा सुरु भएको निर्माण कार्य २०८२ असार मसान्तमा सम्पन्न भएको हो।
भूमि व्यवस्था कृषि तथा सहकारी मन्त्रालयका प्रदेश सचिव शंकर शाह, राष्ट्रिय दलित नेटवर्कका केन्द्रीय अध्यक्ष मोहन ओड, महासचिव पार्वती आग्री Habitat For Humanity Nepal कार्यक्रम प्रमुख पुनिता चौधरी र मोती भागरती आधारभूत विद्यालयका सहायक प्रधानाध्यापक शिवराज गौतम लगायतका अतिथिहरूको सहभागिता रहेको थियो।
कार्यक्रम उपभोक्ता समितिका अध्यक्ष तुलसीराम चौधरीको सभापतित्वमा सम्पन्न भएको थियो। स्वागत मन्तव्य कलौटी चौधरीले गर्नुभएको थियो भने सञ्चालन गोरख सार्कीले गर्नुभएको थियो।
