काठमाडौँ, दक्षिणाम्नाय शारदापीठ शृङ्गेरीका शङ्कराचार्य श्री श्री विधुशेखर भारती सन्निधानमले बूढानीलकण्ठ मन्दिरमा पूजाआराधना एवं दर्शन गर्नुभएको छ । आज बिहान उहाँ बूढानीलकण्ठमा पूजाआराधनाका लागि आज आउनुभएको हो ।मन्दिरमा उहाँ पूजामा सहभागी भई सहस्रकमल अर्पण गर्नुभयो । पूजाआराधनापछि मन्दिर परिसरमा प्रवचन दिँदै शृङ्गेरीका शङ्कराचार्य विधुशेखरले नेपालीमा धर्म, संस्कृतिप्रतिको आस्था प्रगाढ रहेको बताउनुभयो । वैदिक दर्शनको मूल्य, मान्यतामा आधारित नेपाल र भारत पूर्वीय दर्शन एवं ज्ञानकाबारेमा विश्वमा नेतृत्व गर्न सक्षम भएको पनि उहाँले बताउनुभयो ।
शङ्कराचार्यलाई बूढानीलकण्ठ दशनामी मठका महन्त स्वामी निगमानन्दले त्यस क्षेत्रका सम्पदा र तिनको महत्वका बारेमा जानकारी गराउनुभएको थियो । विधुशेखर भारतीले श्री पशुपतिनाथ, मुक्तिनाथ, देवघाटधाम, मौलाकालिकालगायत तीर्थस्थलको पूजाआराधना एवं दर्शन गर्नुहुने कार्यक्रम रहेको उहाँको भ्रमण व्यवस्थापनका लागि गठन गरिएको सचिवालयले जनाएको छ ।
काठमाडौँमा उहाँले वसन्तपुरस्थित कालभैरवको दर्र्शन गरी त्यस क्षेत्रका सम्पदाको पनि आज दिउँसो अवलोकन गर्नुहुने कार्यक्रम छ । साथै पाटनको कृष्णमन्दिर र त्यहाँका सम्पदास्थलको पनि अवलोकन गर्नुहुनेछ । भाटभटेनी मन्दिर र किओच बाल अस्पतालको उद्घाटनसमेत गर्नुहुने कार्यक्रम रहेको भ्रमण व्यवस्थापन सचिवालयले जनाएको छ ।
शृङ्गेरी पीठका उत्तराधिकारी शङ्कराचार्यको यो नेपाल भ्रमण करिब ६१ वर्षपछि भएको हो । यसअघि विसं २०२२ मा शृङ्गेरीका शङ्कराचार्यले नेपाल भ्रमण गर्नुभएको थियो । उहाँको भ्रमणलाई ‘धार्मिक विजय यात्रा नेपाल २०८३’ नाम दिइएको छ ।
शङ्कराचार्य विधुशेखर नेपाल आएका बेला पशुपतिनाथ परिसरस्थित शङ्कराचार्य मठमा विशेष कार्यक्रम आयोजना गरिएको छ । यो कार्यक्रम शुक्रबार साँझदेखि चन्द्रमौलेश्वरको पूजाआराधना गरी सुरु भएको हो । शारदा पीठ आद्य शङ्कराचार्यले स्थापना गर्नुभएका चार पीठमध्ये पहिलो पीठ हो ।
नेपालमा रहेका धार्मिक सम्पदाको तीर्थयात्राका लागि विधुशेखर शुक्रबार काठमाडौँ आइपुग्नुभएको हो । काठमाडौँ आएलगत्तै उहाँले पशुपति क्षेत्रस्थित शङ्कराचाय मठमा सङ्क्षिप्त प्रवचन गर्नुभएको थियो । त्यसलगत्तै उहाँले शुक्रबार बेलुकी बत्तीसपुतलीस्थित श्रीरामचन्द्र मन्दिरमा पनि पूजाआराधना गर्नुभएको थियो ।राष्ट्रिय समाचार समिति (रासस)
