कैलाली । कैलालीको बर्दगोरिया गाउँपालिका वडा नम्बर ५ ले सार्वजनिक सुनुवाइ सम्पन्न गरेको छ । शनिवार एक कार्यक्रमकाको आयोजना गर्दै वडावासीका बिच आर्थिक वर्ष २०७९/०८० का आफ्ना वार्षिक गतिविधिहरू सार्वजनिक गरेको हो ।
वडा कार्यालयले चालु आर्थिक वर्षमा ३० लाखका विभिन्न योजनाहरू निर्माण गरेको वडा सचिव शेर बहादुर बडायकले प्रस्तुत गरेको प्रतिवेदनमा उल्लेख छ । यस्तै वडा कार्यालयले यस आर्थिक वर्षको जेठ ३२ गते सम्म ११ लाख ६७ हजार १ सय ११ रुपैयाँ राजस्व सङ्कलन गरेको छ । सम्पत्ति करबाट ७ लाख ५२ हजार २ सय ५५ रुपैयाँ राजस्व सङ्कलन गरेको कार्यालयले भूमि कर तथा मालपोतबाट २० हजार २ सय १९, घर बहाल करबाट १२ हजार ३ सय ३२, सिफारिस दस्तुरबाट १ लाख ८४ हजार ९ सय ५५, व्यक्तिगत घटना दर्ता दस्तुरबाट ८८ हजार ८ सय, नाता प्रमाणित दस्तुरबाट ८ हजार १ सय र अन्य दस्तुरबाट १ लाख ४ सय ५० रुपैयाँ सङ्कलन गरेको छ ।
यस्तै यो वर्ष ५ सय ७२ जनाले सामाजिक सुरक्षा भत्ता प्राप्त गरेका छन् । ३ सय ४८ जनाले ज्येष्ठ नागरिक भत्ता, २८ जनाले ज्येष्ठ नागरिक एकल महिला भत्ता, ८५ जानाले एकल महिला भत्ता, ८ जनाले पूर्ण अपाङ्गता भत्ता, ३६ जनाले अति असक्त अपाङ्गता भत्ता र ६७ जनाले दलित बालबालिका भत्ता प्राप्त गरेका हुन ।
वडा कार्यालयमा यो वर्ष २ सय ५० जनाले व्यक्तिगत घटना दर्ता गराएका छन् । १ सय ४७ जनाको जन्म दर्ता भएको छ भने ३१ जनाको मृत्यु दर्ता गरिएको छ । यस्तै ३० जना वडामा बसाई सरी आएका छन् भने २० जना बसाई सरी गएका छन् । १ जनाले सम्बन्ध विच्छेद, ५३ जनाले विवाह दर्ता गराएका छन् ।
वडा अध्यक्ष भोलेराम चौधरीको अध्यक्षतामा भएको कार्यक्रममा गाउँपालिकाका उपाध्यक्ष गणेशराज गिरी प्रमुख अतिथि रहेका थिए । कार्यक्रममा विभिन्न टोलहरूबाट स्थानीयहरूको सहभागिता रहेको थियो । उनीहरूले जनप्रतिनिधि तथा कर्मचारीलाई प्रश्न, जिज्ञासा राख्दै सुझावहरू समेत दिए । प्रश्नहरूको जवाफ दिँदै जनप्रतिनिधि तथा कर्मचारीहरूले जनताको सुझावलाई निकै सकारात्मक रूपमा ग्रहण गरी अघि बढ्ने बताएका छन् ।
भिडियो सहित
