कैलाली । कैलाली जिल्लाको बर्दगोरिया गाउँपालिका वडा नम्बर ४ मा सञ्चालन भइरहेको निःशुल्क थारु लेहेंगा–चोली बनाउने तालिमले स्थानीय महिलामा नयाँ उत्साह थपेको छ। व्यावसायिक तथा सीप विकास तालिम केन्द्र धनगढी र वडा कार्यालयको सहकार्यमा दुई महिने २६० घण्टे तालिम सञ्चालन गरिएको हो।
थारु समुदायको मौलिक पहिरन संरक्षणसँगै महिलालाई आत्मनिर्भर बनाउने उद्देश्यले सञ्चालन गरिएको तालिममा थारु महिलासँगै पहाडी समुदायका महिलाको पनि सक्रिय सहभागिता रहेको छ।
वडा नम्बर ४ की कक्षा १० मा अध्ययनरत अन्नु चौधरीले तालिमले आफूमा नयाँ आत्मविश्वास थपिएको बताइन्। “आफ्नै संस्कृति चिन्ने र आफ्नै हातले पोशाक बनाउन सिक्न पाउँदा निकै खुसी लागेको छ,” उनले भनिन्।
स्थानीय बबिता देवी चौधरीले तालिमले सीप त दिएको भए पनि आवश्यक सामग्री खरिद गर्न आर्थिक अभाव रहेको गुनासो गरिन्। “सीप सिकिरहेका छौं, तर कपडा, डिजाइन सामग्री र मेसिन किन्न सक्ने अवस्था छैन। सम्बन्धित निकायले थप सहयोग गरिदिए धेरै सहज हुन्थ्यो,” उनले आग्रह गरिन्।
तालिम प्रशिक्षक मेनुका चौधरीका अनुसार सुरुमा सिक्न केही कठिन भए पनि अभ्यासपछि यही सीप आम्दानीको बलियो माध्यम बन्न सक्छ। “सीप सिकेर मात्र राख्ने होइन, व्यवहारमा उतार्नुपर्छ। यसले संस्कृति जोगाउँछ, आत्मनिर्भर पनि बनाउँछ,” उनले भनिन्।
स्थानीय सरिता बिकले विगतमा यस्ता तालिमबारे जानकारीसमेत नपाइने गरेको स्मरण गर्दै अहिले वडामा भइरहेका गतिविधिबारे सहजै जानकारी पाउन थालेको बताइन्। “वडा अध्यक्ष जगतबहादुर शाही आएपछि विकास र तालिमका गतिविधि गाउँमै पुगेका छन्,” उनले भनिन्।
विन्दु डगौराले आफूले लगाउँदै आएको पहिरन कसरी तयार हुन्छ भन्ने जानकारी नभएको बताउँदै अहिले आफ्नै हातले बनाउन सिक्दा गर्व महसुस भएको सुनाइन्।
अनमिका डगौरा थारुले सडक, पुल र भवन निर्माण मात्रै विकास नभई यस्ता सीपमूलक कार्यक्रम पनि वास्तविक विकास भएको बताइन्। “हातमा सीप भएपछि जहाँ गए पनि काम पाइन्छ। पहिले महँगो मूल्यमा किन्ने लुगा अब आफैं बनाउन सकिने भएको छ,” उनले भनिन्।
वडा नम्बर २ बाट तालिम लिन आएकी कुसुम चौधरीले यस्ता कार्यक्रमले महिलाको जीवनस्तर परिवर्तन गर्न मद्दत पुग्ने विश्वास व्यक्त गरिन्।
वडाध्यक्ष जगतबहादुर शाही ले जनताको मागअनुसार विभिन्न संघसंस्थासँग सहकार्य गरेर सीपमूलक तालिम सञ्चालन गर्दै आएको बताए। उनका अनुसार थारु समुदायको बाक्लो बस्ती भएकाले लेहेंगा–चोलीको मागसमेत बढ्दो छ।
“यो केवल सीप सिकाउने कार्यक्रम होइन, संस्कृति संरक्षणको अभियान पनि हो,” उनले भने, “घरमै उत्पादन गरेर बजारसम्म पुर्याउन सके महिलाहरू आर्थिक रूपमा आत्मनिर्भर बन्न सक्छन्।”
उनले निर्वाचित भएपछि विभिन्न संघसंस्थासँग सहकार्य गरी वडामा २२ वटा तालिम सञ्चालन गरिएको जानकारी दिँदै ती तालिमबाट धेरैले व्यवसाय सुरु गरी आम्दानीसमेत गर्न थालेको बताए।
