कैलाली — कैलाली जिल्लाको बर्दगोरिया गाउँपालिका वडा नं. १ मा बहुप्रतीक्षित कालोपत्रे सडक निर्माण कार्यको आज एक भव्य कार्यक्रमका बीच औपचारिक रूपमा शिलान्यास गरिएको छ। गाउँपालिका अध्यक्ष कर्णबहादुर कुँवरले सडक निर्माण कार्यको शिलान्यास गर्दै स्थानीय तहले विकास निर्माणका योजनाहरूलाई तीव्र गतिमा अगाडि बढाइरहेको बताउनुभएको छ।
स्थानीय सरकार गठन भएपछि ग्रामीण क्षेत्रका सडकहरूको स्तरोन्नतिलाई प्राथमिकतामा राखिएको भन्दै अध्यक्ष कुँवरले अब गाउँ–गाउँमा विकासको अनुभूति गराउने गरी काम भइरहेको उल्लेख गर्नुभयो।
पूर्व पश्चिम राजमार्ग महेन्द्र राजमार्ग दोदोधारा अस्पताल चोकदेखि सशस्त्र बेस क्याम्प झकडपुर सेती राजमार्ग हुँदै झकडपुरदेखि पूर्वपश्चिम महेन्द्र राजमार्ग कट्टीपुर चोकसम्म करिब ३ किलोमिटर सडक कालोपत्रे गरिने भएको हो। लामो समयदेखि धुलाम्मे तथा वर्षायाममा हिलाम्मे हुने समस्याबाट स्थानीयवासी पीडित हुँदै आएका थिए। सडक कालोपत्रे हुने भएपछि स्थानीयवासीमा खुशीको लहर छाएको छ।
उक्त सडक निर्माण कार्यको जिम्मा काली रक्षा बिल्डर्सले पाएको छ भने निर्माण कार्यको ठेकेदार यज्ञमान कुँवर रहेका छन्। बर्दगोरिया गाउँपालिकाका असिस्टेन्ट सब–इन्जिनियर झंकर बुढाका अनुसार प्रारम्भिक रूपमा १ करोड ८० लाख रुपैयाँ लागत अनुमान गरी टेण्डर आह्वान गरिएको भए पनि प्रतिस्पर्धात्मक प्रक्रियामार्फत काली रक्षा बिल्डर्सले १ करोड २३ लाख ८४ हजार रुपैयाँमा ठेक्का प्राप्त गरेको हो।
उहाँका अनुसार योजना संघीय सरकार र गाउँपालिकाको संयुक्त लगानीमा सञ्चालन भइरहेको छ। संघीय सरकार र गाउँपालिकाको सहकार्यमा ग्रामीण पूर्वाधार विकासलाई गति दिने उद्देश्यले सडक निर्माण कार्य अगाडि बढाइएको जनाइएको छ।
कार्यक्रमलाई सम्बोधन गर्दै गाउँपालिका अध्यक्ष कर्णबहादुर कुँवरले आफ्नो नेतृत्वको जनप्रतिनिधि टोली निर्वाचित भएपछि पालिकाभरिका अधिकांश क्षेत्रमा पानी पिचको काम सम्पन्न गरिसकेको र अहिले क्रमशः कालोपत्रे सडक निर्माण कार्यलाई प्राथमिकताका साथ अगाडि बढाइएको बताउनुभयो।
“हामीले विकास निर्माणलाई केवल नारामा सीमित राखेका छैनौं। जनताको दैनिक जीवनसँग प्रत्यक्ष जोडिएका सडक, पुल–पुलेसा, खानेपानी, स्वास्थ्य र शिक्षा क्षेत्रलाई प्राथमिकतामा राखेर काम गरिरहेका छौं,” अध्यक्ष कुँवरले भन्नुभयो।
उहाँले विकासका योजनाहरू जनताको आवश्यकता र सुझावअनुसार अघि बढाइएको उल्लेख गर्दै आगामी दिनमा अझ प्रभावकारी र दीर्घकालीन योजनाहरू ल्याइने जानकारी दिनुभयो।
त्यस्तै वडा नं. १ का वडा अध्यक्ष मिथुन गौतमले स्थानीय सरकार जनताप्रति उत्तरदायी भएर काम गरिरहेको बताउनुभयो। उहाँले जनताको आवश्यकता र चाहनाअनुसार नै विकास निर्माणका योजनाहरू सञ्चालन गरिएको उल्लेख गर्दै गाउँपालिकाको विकासमा सबैको साथ र सहयोग आवश्यक रहेको धारणा राख्नुभयो।
कार्यक्रममा सहभागी स्थानीयवासीहरूले समेत सडक कालोपत्रे कार्य सुरु भएकोमा खुशी व्यक्त गरेका छन्। स्थानीय भीमबहादुर बिठारीले विगतमा धुलाम्मे तथा खाल्डाखुल्डीले भरिएको सडकका कारण स्थानीयवासीले निकै सास्ती भोग्नुपरेको स्मरण गर्दै अहिले सडक स्तरोन्नति हुन थालेपछि सहजता थपिएको बताउनुभयो।
“जनताको दुःख–पीडालाई बुझेर स्थानीय सरकारले पहिला पानी पिच गर्यो, जसले गर्दा यात्रा गर्न सहज भयो। अहिले त्यसै सडकलाई कालोपत्रे गर्न लागिएको छ। जहाँ जहाँ जनतालाई समस्या छ, त्यहाँ त्यहाँ सरकार पुगेको देखिन्छ,” उहाँले भन्नुभयो।
उहाँले सामाजिक सञ्जाल तथा चिया चौतारोमा अनावश्यक आलोचना गर्नेभन्दा पनि सरकारले गरेका सकारात्मक र जनमुखी कामहरूको समर्थन गर्नुपर्ने धारणा व्यक्त गर्नुभयो।
त्यस्तै अर्का स्थानीय अर्जुनबहादुर ओडले पनि सडक स्तरोन्नतिको कार्यबाट आफूहरू निकै उत्साहित भएको बताउनुभयो। “पहिला पानी पिच गरियो, अहिले कालोपत्रे सुरु भएको छ। स्थानीय सरकारको कामप्रति हामी निकै खुशी छौं। सडक राम्रो भएपछि व्यापार, आवतजावत, विद्यार्थीको यात्रा तथा बिरामी ओसारपसारमा ठूलो सहजता हुनेछ,” उहाँले भन्नुभयो।
स्थानीयवासीका अनुसार सडक कालोपत्रे भएपछि वर्षौंदेखिको धुलो र हिलोको समस्या अन्त्य हुने अपेक्षा गरिएको छ। यसले स्थानीय व्यापार व्यवसाय, कृषि उत्पादन ढुवानी तथा शैक्षिक र स्वास्थ्य सेवामा समेत सकारात्मक प्रभाव पार्ने विश्वास गरिएको छ।
शिलान्यास कार्यक्रममा कार्यपालिका सदस्य सरस्वती तिरुवा, विभिन्न वडाका जनप्रतिनिधि, समाजसेवी, बुद्धिजीवी, स्थानीय युवा तथा सर्वसाधारणको उल्लेखनीय सहभागिता रहेको थियो। कार्यक्रममा सहभागीहरूले विकास निर्माणका कार्यलाई निरन्तरता दिन स्थानीय सरकारलाई आग्रह समेत गरेका थिए।
सडक निर्माण कार्य २०८३ साल वैशाख २७ गतेदेखि औपचारिक रूपमा सुरु भएको हो भने आगामी असार मसान्तसम्म सम्पन्न गर्ने लक्ष्य राखिएको गाउँपालिकाले जनाएको छ। निर्धारित समयभित्र निर्माण कार्य सम्पन्न भएमा स्थानीयवासीले वर्षौंदेखि भोग्दै आएको सडक समस्याबाट मुक्ति पाउने अपेक्षा गरिएको छ।
ग्रामीण क्षेत्रको पूर्वाधार विकासलाई प्राथमिकतामा राखेर सञ्चालन गरिएको यो योजना बर्दगोरिया गाउँपालिकाको विकास यात्रामा महत्वपूर्ण उपलब्धिका रूपमा हेरिएको स्थानीयवासीहरूको भनाइ छ।
