कैलाली — कैलालीको घोडाघोडी नगरपालिका वडा नम्बर १ सुखडस्थित न्यू स्टार इङ्ग्लिस बोर्डिङ स्कुलले माध्यमिक शिक्षा परीक्षा (एसइई) २०८३ मा उत्कृष्ट नतिजा हासिल गर्दै आफ्नो शैक्षिक गुणस्तर पुनः प्रमाणित गरेको छ। स्कुलले सार्वजनिक गरेको नतिजाअनुसार यस वर्ष सहभागी अधिकांश विद्यार्थीले उच्च GPA सहित सफलता हासिल गरेका छन्।
स्कूलका अनुसार एसइई परीक्षामा सहभागी २१ जना विद्यार्थिमध्ये ११ जनाले A+, ८ जनाले A र २ जनाले B+ ग्रेड प्राप्त गरेका छन्। नतिजाले स्कुलको निरन्तर शैक्षिक प्रगति, शिक्षकहरूको मेहनत र विद्यार्थीहरूको लगनशीलता झल्काएको स्कूल प्रशासनले जनाएको छ।
यस वर्ष न्यू स्टारका विद्यार्थीहरूले उल्लेखनीय GPA ल्याएका छन्। सिरक सिंहले ३.७७ GPA प्राप्त गर्दै उत्कृष्ट प्रदर्शन गरेका छन् भने युबराज सापकोटाले ३.७६ GPA ल्याएका छन्। त्यसैगरी आयुष्मा भट्टाले ३.६९ GPA, अनिल मल्लाले ३.६७ GPA, सुसान्त सुनारले ३.६७ GPA तथा कमल बिष्ट, अर्जुन आचार्य र आर्या भट्टराईले समान ३.६४ GPA प्राप्त गरेका छन्।
त्यस्तै अनु मगर, ज्यानिक रोकाया र मिलन चन्द दामले ३.६३ GPA ल्याएका छन्। स्कुलले सार्वजनिक गरेको नतिजामा अधिकांश विद्यार्थीले ३ भन्दा माथिको GPA ल्याउन सफल भएका छन्, जसलाई स्कुलको गौरवपूर्ण उपलब्धिका रूपमा लिएको छ।
स्कूलका संस्थापक प्रिन्सिपल परशुराम भण्डारी (पीआर) ले विद्यार्थीहरूको सफलताप्रति खुसी व्यक्त गर्दै यो नतिजा सबैको संयुक्त मेहनतको प्रतिफल भएको बताए। उनले भने,
“विद्यार्थीहरूको निरन्तर मेहनत, शिक्षकहरूको समर्पण र अभिभावकको विश्वासकै कारण विद्यालयले यो सफलता हासिल गरेको हो। आगामी दिनमा अझ गुणस्तरीय शिक्षा प्रदान गर्दै विद्यार्थीको भविष्य उज्ज्वल बनाउन हामी निरन्तर लागिरहनेछौं।”
उनका अनुसार स्कुलले पढाइसँगै अनुशासन, नैतिक शिक्षा तथा अतिरिक्त क्रियाकलापलाई पनि समान प्राथमिकता दिँदै आएको छ। यही कारण पछिल्ला वर्षहरूमा न्यू स्टार इङ्ग्लिस बोर्डिङ स्कुल घोडाघोडी क्षेत्रकै उत्कृष्ट शैक्षिक संस्थामध्ये एकका रूपमा स्थापित हुँदै गएको उनले बताए।
स्थानीय अभिभावक तथा शिक्षा प्रेमीहरूले स्कुलको सफलताप्रति बधाई व्यक्त गर्दै आगामी वर्षमा अझ उत्कृष्ट नतिजाको अपेक्षा गरेका छन्। एसइई २०८३ को नतिजासँगै विद्यालय परिसर तथा सुखड क्षेत्रमा खुसीको वातावरण छाएको छ।
