घोडाघोडी । कैलालीमा ‘कैलाली डान्सिङ स्टार–२०८३’ प्रतियोगिता आयोजना हुने भएको छ । रोयल डान्स स्टुडियोको आयोजनामा हुने उक्त प्रतियोगिताबारे घोडाघोडी नगरपालिका–सुखडमा आयोजित पत्रकार सम्मेलनमार्फत जानकारी दिइएको हो ।
सञ्चालक पर्लभ बुढाथोकीका अनुसार २५ वर्षमुनिका युवायुवतीहरूले प्रतियोगितामा सहभागिता जनाउन सक्नेछन् । कैलालीका धनगढी, अत्तरिया, सुखड, लम्की, टीकापुर, भजनी लगायत स्थानमा अडिसन सञ्चालन गरिनेछ भने सुदूरपश्चिमका अन्य जिल्लाबाट समेत सहभागिता जनाउन सकिनेछ ।
प्रतियोगितामा नेपाली गीत–संगीतमा आधारित नृत्य प्रस्तुति अनिवार्य गरिएको छ । पुराना तथा नयाँ नेपाली गीतहरू प्रयोग गर्न पाइने भए पनि आइटम गीत प्रयोग गर्न नपाइने नियम रहेको सञ्चालक बुढाथोकीले जानकारी दिनुभयो । सहभागीहरूले विभिन्न जातजाति तथा संस्कृतिमा आधारित पोसाक र प्रस्तुति दिन सक्नेछन् ।
अडिसन चरणमा सहभागीहरूले १ देखि १.५ मिनेटसम्मको नृत्य प्रस्तुति दिनुपर्नेछ। त्यसपछि मेगा राउन्ड, कोरियोग्राफी राउन्ड, अतिरिक्त चरण हुँदै कुल ११ चरणमा प्रतियोगिता सञ्चालन गरिनेछ, जसमा सात चरण भोटिङ राउन्ड रहनेछ ।
कार्यक्रमका विभिन्न चरणमा फरक–फरक निर्णायक (जज)हरूको टोली रहनेछ । अडिसन चरणमा नयाँ पुस्ताका नृत्य प्रशिक्षक तथा कोरियोग्राफरहरूलाई अवसर दिइनेछ भने मेगा राउन्ड तथा अन्य चरणमा अनुभवी निर्णायकहरू रहनेछन्। अन्तिम फाइनल निर्णायकको भूमिकामा कलाकार राहुल शाह रहने आयोजकले जानकारी दिएका छन् ।
प्रतियोगितामा प्रथम हुनेले रु. १ लाख १ हजार, द्वितीयले रु. ५५ हजार ५५५ र तृतीयले रु. ३५ हजार ५११ प्राप्त गर्नेछन्। साथै विजेतालाई एक वर्ष निःशुल्क नृत्य प्रशिक्षण र भविष्यमा म्युजिक भिडियोमा अवसर दिने योजना समेत रहेको सञ्चालक बुढाथोकीले बताउनुभयो ।
कार्यक्रम सञ्चालन तथा समग्र व्यवस्थापन रोयल डान्स स्टुडियोका संस्थापक तथा कोरियोग्राफर पर्लभ बुढाथोकीले गर्नुभएको छ । उहाँले प्रतियोगिताको उद्देश्य युवाहरूलाई लागूऔषध तथा मोबाइल लतबाट टाढा राख्दै उनीहरूको प्रतिभा उजागर गर्नु रहेको बताउनुभयो ।
जज सन्तोष अवस्थीले यस्ता कार्यक्रमहरू प्रतिभा विकाससँगै सिकाइ र सांस्कृतिक प्रवद्र्धनका महत्त्वपूर्ण माध्यम भएको बताउनुभयो। उहाँले यसअघि पनि रोयल डान्स स्टुडियोको आयोजनामा सम्पन्न घोडाघोडी नगर स्तरीय डान्स प्रतियोगितादेखि नै आफू जोडिँदै आएको उल्लेख गर्दै आयोजकप्रति आभार व्यक्त गर्नुभयो । उहाँका अनुसार नृत्यमार्फत बालबालिकामा अनुशासन, आत्मविश्वास र आपसी सम्मान विकास हुन्छ ।
त्यस्तै, जज दिनेश बोहराले अहिलेका बालबालिकाले आफ्नो मौलिक प्रतिभा पहिचान गर्न आवश्यक रहेको बताउँदै यस्ता प्रतियोगिताले प्रतिभा पहिचान र विकासमा सहयोग गर्ने धारणा राख्नुभयो ।
पत्रकार सम्मेलनमा हास्य कलाकार तथा सल्लाहकार दीपेन्द्र वलीले यस्ता कार्यक्रमहरूले युवाहरूलाई मोबाइलको लत तथा लागुऔषधजस्ता कुलतबाट टाढा राख्न महत्त्वपूर्ण भूमिका खेल्ने बताउनुभयो । प्रतियोगिताको अडिसन जेठ २३ गतेबाट सुरु हुनेछ ।
