कैलाली। अनलाइन टिभी पत्रकार सङ्घ नेपाल सुदूरपश्चिम प्रदेशका महासचिव तथा वैज्ञानिक मिडियाका प्रबन्ध निर्देशक टिकाराम साउद सम्मानित भएका छन्।
कैलालीको बर्दगोरिया गाउँपालिकाको १८औँ गाउँसभाका अवसरमा स्थानीय तहको विकास, सुशासन, पारदर्शिता तथा समृद्धिको प्रवर्द्धनमा पत्रकारितामार्फत पुर्याएको उल्लेखनीय योगदानको कदरस्वरूप गाउँपालिकाले साउदलाई सम्मान गरेको हो।
वि.सं. २०७० सालदेखि पत्रकारिता क्षेत्रमा सक्रिय साउदले रेडियो, पत्रपत्रिका, टेलिभिजन हुँदै पछिल्लो समय अनलाइन सञ्चार माध्यममार्फत निरन्तर पत्रकारिता गर्दै आएका छन्। सुदूरपश्चिम प्रदेशमा व्यावसायिक, उत्तरदायी र विश्वसनीय पत्रकारिताको प्रवर्द्धन, सञ्चार क्षेत्रको संस्थागत विकास तथा अनलाइन मिडियाको सुदृढीकरणमा उनले महत्वपूर्ण भूमिका निर्वाह गर्दै आएका छन्। हाल उनी अनलाइन टिभी पत्रकार सङ्घ नेपाल सुदूरपश्चिम प्रदेशका महासचिवका रूपमा सक्रिय छन्।
सम्मान ग्रहणपछि प्रतिक्रिया दिँदै साउदले प्राप्त सम्मानले आफूलाई अझ जिम्मेवार, प्रतिबद्ध र प्रेरित बनाएको बताए।
उनले भने, “पत्रकारिता केवल समाचार सम्प्रेषण गर्ने माध्यम मात्र होइन, समाजलाई सही सूचना, सत्य तथ्य र जनचेतना प्रदान गर्ने महत्वपूर्ण दायित्व पनि हो। यो सम्मानले आगामी दिनमा अझ निष्पक्ष, तथ्यपरक र जनउत्तरदायी पत्रकारिता गर्न थप ऊर्जा दिएको छ।”
उनले सञ्चार माध्यमले लोकतन्त्र, सुशासन, पारदर्शिता र सामाजिक उत्तरदायित्वलाई सुदृढ बनाउन महत्वपूर्ण भूमिका खेल्ने उल्लेख गर्दै पत्रकारहरूले सत्य, निष्पक्षता र व्यावसायिक आचारसंहितालाई आत्मसात् गरी समाजप्रति उत्तरदायी बन्नुपर्ने धारणा व्यक्त गरे।
“सकारात्मक परिवर्तनका पक्षमा कलम चलाउनु, नागरिकका आवाजलाई सम्बन्धित निकायसम्म पुर्याउनु र विकास निर्माणका गतिविधिलाई जनतासामु तथ्यका आधारमा प्रस्तुत गर्नु नै पत्रकारिताको मूल उद्देश्य हो,” उनले भने।
बर्दगोरिया गाउँपालिकाले स्थानीय सरकार र सञ्चार क्षेत्रबीचको सहकार्यलाई थप प्रभावकारी बनाउँदै विकास, सुशासन र जनउत्तरदायित्व प्रवर्द्धनमा योगदान पुर्याउने पत्रकार तथा सञ्चारकर्मीहरूको सम्मानलाई आगामी दिनमा पनि निरन्तरता दिइने जनाएको छ।
गाउँपालिकाले स्थानीय तहको विकास, सुशासन, सेवा प्रवाह तथा संस्थागत सुदृढीकरणमा उल्लेखनीय योगदान पुर्याएको मूल्याङ्कन गर्दै पालिकाभित्रका सम्पूर्ण जनप्रतिनिधि, शाखा प्रमुख, वडा सचिव तथा कर्मचारीहरूलाई कदरपत्रद्वारा सम्मान गरेको हो।
