टीकापुर,-कैलालीमा निर्वाचन कार्यालयले आगामी स्थानीय तह निर्वाचनको आन्तरिक तयारीलाई तीव्रता दिएको छ । सरकारले आगामी वैशाख ३० गते स्थानीय तह निर्वाचनको मिति घोषणा गरेसंगै निर्वाचनको तयारी जुटेको हो ।
प्रदेश निर्वाचन कार्यालय कैलालीले मतदाता नामावली अद्यावधिक गर्ने तयारी भएको जनाएको छ । निर्वाचनमा मतदान गर्न योग्य मतदाताको यकिन गर्न कार्यालयले मतदाता नामावली अद्यावधिक गर्न लागेको हो ।
निर्वाचन कार्यालयले दोहोरो परेका, नागरिकता त्यागेका, मृत्यु भएका, बसाईसरी गएका र त्रुटि भएका मतदाताको नामावली अद्यावधिक गर्न लागेको हो । फागुन २० देखि २६ सम्म मतदाताको नामावली अद्यावधिक गरिने प्रदेश निर्वाचन कार्यालय कैलालीका निमित्त कार्यालय प्रमुख प्रेमराज भट्टले जानकारी दिनुभयो ।
‘मतदाता नामावलीमा दर्ता भएका १८ वर्षमुनिका व्यक्तिको नाम हटाएर आयोगले हामीकहाँ पठाएको छ । अब त्यसलाई अद्यावधिक गरेर पुनः आयोगमा पठाउँछौँ । त्यसपछि मात्र आयोगले फोटोसहित मतदाताको अन्तिम नामावली प्रकाशन गर्छ’, उहाँले भन्नुभयो । आगामी चैत्र १३ गतेसम्म मतदाताको अन्तिम नामावली प्रकाशित गरिनेछ । उक्त अवधिमा नामावली अद्यावधिक गर्दा मतदाता संख्या थपघट हुन सक्ने उहाँले बताउनुभयो ।
निर्वाचन आयोगले आगामी २९ वैशाखसम्म पनि १८ वर्ष नपुग्ने मतदाता नामावलीमा दर्ता भएका व्यक्तिको नामावली हटाएर जिल्लामा पठाएको छ । कैलालीमा त्यस्ता मतदाताको संख्या ५ लाख २७ हजार ५४८ रहेको छ । जसमध्ये पुरुष मतदाता संख्या २ लाख ५२ हजार २९२, महिला मतदाता संख्या २ लाख ७० हजार २४८ र अन्य ११ जना रहेका छन् ।
यसअघि ५ पुस २०७७ सम्म निर्वाचन कार्यालयले गरेको मतदाता नामावली अद्यावधिक विवरणअनुसार कैलालीमा ४ लाख ९८ हजार ९९ मतदाता थिए ।
पछिल्लो पाँच वर्षमा ६६ हजार ९७० मतदाता थपिएका छन् । २०७४ मा भएको स्थानीय तहको निर्वाचनमा कैलालीमा ४ लाख ६० हजार ५७८ मतदाता थिए । ६ वटा नगरपालिका, ६ वटा गाउँपालिका र एउटा उपमहानगरपालिका रहेको कैलालीमा ७४ प्रतिशतले मताधिकार प्रयोग गरेका थिए ।
मतदाताको नामावली अद्यावधिक गर्न तथा कुनै दाबी विरोध भए उजुरी गर्न निर्वाचन कार्यालयले आह्वान गरेको छ । अद्यावधिक तथा दाबी विरोधको कार्यक्रमको सूचना तथा मतदाता नामावली यही १९ फागुनसम्ममा वडा कार्यालय, स्थानीय तह, नापी, मालपोत कार्यालयलगायतका स्थानमा टाँसिने उहाँले बताउनुभयो ।
दोहोरो परेका, नागरिकता त्यागेका, मृत्यु भएका, बसाईसरी गएका र त्रुटि भएका सच्चाउन वा कसैले झुटा विवरण दिएर मतदाता नामावली दर्ता गरेमा उजुरी गर्न २० देखि २३ फागुनभित्र निर्वाचन कार्यालयमा निवेदन दिन उहाँले आग्रह गर्नुभयो । कसैको मतदाता परिचय पत्र हराएको छ भने पनि सम्बन्धित वडाको सिफारिस लिएर निर्वाचन कार्यालयमा निवेदन दिनुपर्ने उहाँले बताउनुभयो ।
मृत्यु भएका वा नागरिकता त्यागेका व्यक्तिको नामावली हटाउन २० देखि २३ फागुनसम्म एकाघरको सदस्य वा अन्य कुनै व्यक्तिले निर्वाचन कार्यालयमा सूचना दिन सक्नेछन् ।
सरकारले गएको २४ माघमा स्थानीय तहको निर्वाचनको मिति घोषणा गरेपछि मतदाता नामावली दर्ता संकलनको काम रोकिएको हो । २०७४ को स्थानीय तहको निर्वाचनमा कैलालीमा २ सय ३१ मतदान स्थल र ५ सय ३८ मतदान केन्द्र रहेका थिए । यस पटक ५ वटा मतदान स्थल थप भएसंगै २३६ पुगेको छ भने, मतदान केन्द्र ६२३ वटा हुन सक्ने अनुमान गरिएको प्रदेश निर्वाचन कार्यालयका सूचना अधिकारी राजेश चौधरीले बताउनुभयो ।
एउटा मतदान स्थलभित्र सात वटासम्म मतदान केन्द्र रहने उहाँले बताउनुभयो । एउटा मतदान केन्द्रमा बढीमा एक हजार मतदाताले मतदान गर्न पाउने गरी व्यवस्था मिलाइने छ ।
