धनगढी । समाजमा आत्महत्याको घटना बढ्दै गएकोले सबै मिलेर आत्महत्याको रोकथाम गर्नुपर्ने धनगढी उपमहानगरपालिकाका उपमेयर कन्दकला रानाले बताएकीछन् । धनगढी उपमहानगरपालिकाले संचालन गरेको सामाजिक परिचालकहरुको लागि आधारभूत मनोसामाजिक सहयोग तथा लैंगिक रुपान्तरण सम्बन्धी १० दिने तालिमको ७ औं दिन अनुगमनमा आएको बेला यस्तो बताएकीहुन् ।
उपमेयर रानाले तालिमका सहभागीलाई तालिम कस्तो लाग्यो र के सिकाई भयो भनेर सोधेकी थिईंन् । जवाफमा सहभागीले अहिले सम्म लिएका मध्ये तालिम सबैभन्दा उत्कृष्ट लागेको र आफैलाई राम्रो संग बुझ्ने मौका मिलेको बताएका थिए । सामाजिक परिचालक पुष्पा शर्माले तालिम पछि समुदायमा मनोसामाजिक समस्या र लैंगिक रुपान्तरणको क्षेत्रमा काम गर्न सहज हुने बताईन् । सहभागी बिन्दु केसीले निकै महत्वपूर्ण तालिम दिएकोमा धनगढी उपमहानगरपालिकालाई धन्यवाद व्यक्त गरिन् ।
आत्महत्याको समस्याका कारण समाजमा धेरैले ज्यान गुमाउनु परेको छ । समाजमा चुनौतकिो रुपमा देखिएको आत्महत्याको रोकथाम गर्नुपर्नेमा रानाले जोड दिईन् । मनोसामाजिक समस्याकै कारण व्यक्ति आत्महत्या गर्ने अवस्थासम्म पुग्ने भएकोले मनोसामाजिक समस्या बुझ्न र सहयोग गर्नकै लागि आाधारभूत तालिमको आयोजना गरिएको र तालिमबाट राम्रो सिकाई भएको अनुभव सुन्दा आफूलाई खुसी लागेको बताइन् ।
तालिम प्राप्त गरिसके पछि अब तँपाईहरुले समुदायमा गएर मनोसामाजिक समस्या भएका व्यक्तिहरुको पहिचान गर्ने, घरभेटघाट गर्ने, दुःुखसुखका कुरा गर्ने र आवश्यक सेवाको लागि प्रेषण गर्ने काम गर्नु हुनेछ भन्ने विश्वास मैले गरेको छु । उनले भनिन् ‘ सामाजिक र मानविय विकास नभएसम्म समाज परिवर्तन हुँदैन । सामाजिक परिवर्तनका लागि सबै अग्रसर हुनुपर्छ ।’ इतिहास बनाउने गरी काम गर्नुपर्ने भन्दै यौनिक तथा अल्पसंख्यकलाई अवसर प्रदान गर्दै समाजमा सम्मानजनक व्यवहार गर्नुपर्ने उनले बताइन् ।
महिला विकास अधकृत पंकजा जोशीले सामाजिक परिचालकहरुको समुदायमा भूमिका धेरै महत्वपूर्ण हुने भएकोले आधारभूत मनोसामाजिक सहयोग तालिमले मनोसामाजिक समस्या समाधानमा सहयोग पुग्ने बताइन् । संयुक्त राष्ट्रसंघीय जनसंख्या कोष युएनएफपिएका कैलाली जिल्ला कार्यक्रम संयोजक कृष्ण चौधरीले समाजमा विभिन्न कारणले मनोसामाजिक समस्यामा परेकाहरुलाई सेवा दिनकै लागि यो तालिम आयोजना गरिएको बताए । लैंगिक हिंसाका कारण देखिने मनोसामाजिक समस्यामा काम गर्न तालिम उपयोगी हुने उनले बताए ।
धनगढी उपमहानगरपालिकाको नेतृत्वमा स्वीस विकास सहयोग, नर्वेजिएन दुताबास र संयुक्त राष्ट्रसंघीय जनसंख्या कोष यूएनएफपिएको सहयोगमा लैंगिक विभेदमा आधारित हिंसा रोकथाम तथा प्रतिकार्य परियोजना दुईवर्ष देखि संचालन भई रहेको छ । तालिमको प्राविधिक सहयोग परियोजनाका साझेदारी संस्थाहरुले गरेकाछन् ।
तालिममा सामाजिक परिचालक, वडा सदस्य र नगर प्रहरी गरी २२ जनाको सहभागिता रहेको छ । तालिमको सहजीकरण सीएमसी नेपालका मनोसामाजिक सुपरभाईजर एवम् मनोविद् यभन श्रेष्ठ, मनोसामाजिक परामर्शकर्ता धनराज विक र जानकी चन्द, भिएसओका सुदरूपश्चिम प्रदेश प्रतिनिधि प्रतिभा चौधरीले गरेकाछन् । साउन १७ गतेदेखि सुरु भएको तालिम साउन २६ गते सम्पन्न हुने महिला विकास अधिकृत पंकजा जोशीले बताइन् ।
