कैलाली । कैलालीको बर्दगोरिया गाउँपालिका वडा नं २ काे सहकार्यमा सशस्त्र प्रहरी बेस क्याम्प झकडपुर,जुनकिरी नेपाल, सहयोगी वेलुवा युवा क्लब, न्यु बर्दगोरिया समूह, बालकल्याण संघले आज शनिबार बर्दगोरिया धाम धार्मिक स्थलमा सरसफाई गरेका छन् । नजिकदै आइरहेको माघी पर्व अथवा माघी मेलालाई मध्यनजर राख्दै धार्मिक क्षेत्र वरपरकाे क्षेत्रमा सरसफाई गरिएको हो । हातमा झाडु बोकेर 
धाममा पुगेका स्थानीयहरूले बाटो, मन्दिर, कार्यक्रम स्थल परिसर सरसफाइ गरेका छन् । बर्दगोरिया गाउँपालिकाको अगुवाइमा भएको सरसफाई अभियानमा आम सरोकारवालाहरूको सहभागिता रहेको थियो । पुस महिनाको २७ गतेदेखि माघ २ गतेसम्म बर्दगोरिया धार्मिक पर्यटकीय साँस्कृतिक माघी मेला २०८० लाई सहयोग होस् भनेर सरसफाई गरिएको अभियानमा सहभागीहरुको भनाई रहेको छ । 
सरसफाइ अभियान पालिका अध्यक्ष कर्ण वहादुर कुँवर विभिन्न जनप्रतिनिधि लगायतका समाजसेवी,बुद्धिजीवी, युवा लगायतका व्यक्ति हरुको सहभागीता रहेको थियो। कार्यक्रममा सहभागी गाउँपालिकाका अध्यक्ष कर्णबहादुर कुँवरले मेला आयोजनाका बेला मात्र नभई हप्ताको एक दिन यो क्षेत्र सरसफाइ गर्ने गरी योजनाबद्ध रूपमा अघि बढ्न आवश्यक रहेको कुरामा जोड दिएका छन् । 
उनले सरसफाइ सँगै फुल तथा वृक्षारोपण र आवश्यक रङ रोगनका कार्यक्रमहरू समेत आयोजना गर्ने गरी अघि बढ्नु पर्ने बताए ।
