कैलाली । कैलालीमा नेपाल मगर संघले ४२ औं मगर दिवस मनाउने तयारी गरेको छ । जिल्लाको जानकी गाउँपालिका–२ कालिकापुरस्थित मगरटोलमा फागुन १४ र १५ गते मगर दिवस मनाउन लागिएको हो । ‘मगर इतिहास, भाषा, संस्कृति र धर्म संरक्षण सम्र्र्वद्धन मगरहरुको मुलमन्त्र मगरात पहिचान र स्वायक्त शासनसहित संघीय लोकतान्त्रिक गणतन्त्र’ भन्ने मूल नारासहित दिवस मनाउन लागिएको छ ।
मगर दिवसका सम्बन्धमा जानकारी दिन बिहीबार आयोजित पत्रकार सम्मेलनमा नेपाल मगर संघ कैलाली जिल्ला सचिवालय सदस्य विरबहादुर घर्तिमगरले दुई दिनसम्म सञ्चालन हुने बताए । उनले नेपाल मगर संघ कैलाली जिल्ला समितिको आयोजना तथा नेपाल मगर संघ जानकी गाउँ समितिको समन्वयमा विविध कार्यक्रमसहित भव्यरुपमा दिवस मनाउन लागेको बताए । मगर समुदायले आफ्नो संस्कृति, रीतिरिवाज र परम्पराको जगेर्ना गर्ने उद्देश्यले मगर समुदायको परम्परालाई जिवित राख्न हरेक वर्ष मगर दिवस मनाउँदै आएका छन् । कार्यक्रममा कैलालीका १३ वटै पालिका र छिमेकी जिल्लाबाट गरी करीब ७ हजार बढी मगर समुदायका प्रतिनिधिको सहभागिता रहनेछ । कार्यक्रममा मगर समुदायको पुराना पौराणिक खेल, कवाज, छेलो हान्ने लगायतका प्रतिस्पर्धात्मक खेल हुनेछन् ।
मगर संस्कृतिसँग जोडिएका मारुनी, मयुर नाच, बसेरी नाचका प्रस्तुत गरिनुका साथै स्थानीय कलाकारहरुको पनि प्रस्तुति रहनेछ । ४२ औं मगर स्थापना दिवसमा मगर समुदायको इतिहासको बारेमा समेत मन्थन गरिने र मगर समुदायलाई एकताबद्ध बनाउने उद्देश्य रहेको संघका कैलाली जिल्ला सचिवालय सदस्य घर्तिमगरले बताए । दिवसको अवसर पारेर सुदूरपश्चिममा पहिलो पटक नौमति बाजाको समुद्घाटन समेत गरिनेछ । पत्रकार सम्मेलनमा नेपाल मगर संघ जानकी गाउँ समितिका अध्यक्ष बजिरसिंह थापा मगरले मगर समुदायको उत्थानको लागि आफूहरुको यो कार्यक्रम फलदायी हुने बताए । देशका हरेक परिवर्तनमा मगर समुदायको महत्पूर्ण भूमिका रहेपनि राज्यले मगर समुदायलाई न्यायोचित ढंगबाट समेटन नसकेको गुनासो गरे ।
जानकी गाउँ समितिको समन्वयमा हुन लागेको मगर दिवसलाई सफल पार्न सहयोग गरिदिन सबैसँग आग्रह गरे । कार्यक्रममा नेपाल मगर संघ जानकी गाउँ समितिका सदस्य शेरबहादुर थापा मगरले देशका हरेक शासनकालमा मगर समुदायको शसक्त भूमिकामा रहेको भए पनि अहिले राज्य सञ्चालनदेखि हरेक तह र तप्कामा कमजोर उपस्थिति रहेको बताए । पछिल्लो समयमा देशको आर्थिक देखि सामाजिक र सांस्कृतिक अवस्था कमजोर हुँदै गएको बताउँदै उनले देशलाई बचाउन पनि मगर समुदाय शसक्त हुनैपर्ने बताए ।
कार्यक्रममा नेपाल मगर संघका पूर्व केन्द्रीय सदस्य धनबहादुर थापाले २०३८/०३९ सालदेखि निरन्तर फागुन १४ र १५ गते मगर दिवसको रुपमा मनाइँदै आएको बताए । मगर समुदायको गाथा नेपालको रक्षार्थ मात्र नभएर विश्व युद्धमासमेत गार्खा सैनिकको रुपमा शसक्त भूमिका रहेको र मगर समुदायको संस्कृति परम्परालाई जिवन्त राख्न हरेक वर्ष निरन्तर रुपमा मगर दिवस मनाइँदै आएको उनले बताए ।
