कैलाली । देशभरका प्रमुख शहरहरुमा इन्टरनेट सेवा दिइरहेको सेवा प्रदायक कम्पनी फाइबरटेल फाइबरनेट प्रा.लि.ले कैलालीको लम्कीस्थित नयाँ भवनमा सरेको छ । नयाँ सजावट तथा व्यवस्थापनका साथ सेवाको थालनी गरिएको सो कम्पनीले जनाएको छ । लम्कीमा सञ्चालित मुख्य कार्यालयको बिहीबार उद्घाटन गरिएको छ । यसअघि मोतिपुरबाट सेवा दिँदै आएको कार्यालय लम्कीमा आफ्नै भवनमा सारिएको शाखा प्रमुख कृष्णप्रसाद जैशीले बताए । सो कम्पनीले मुख्य कार्यालयको नयाँ भवन परिसरमा पूजापाठ आयोजना गरि धुमधामले कार्यालयको सुरुवात गरेको छ । जिल्लाका विभिन्न प्रमुख शहरहरु टीकापुर, जोशीपुर, गुलरा, बौनिया, सुखड, मसुरिया, चौमाला, धनगढीमा यसअघिदेखि नै नियमित सेवा दिइरहेको कम्पनीले जनाएको छ । सेवाग्राहीको माग, आवश्यकता र सेवाको पहुँचलाई मध्यनजर गर्दै केही समयलगत्तै अत्तरियामा पनि शाखा कार्यालय खुल्ने शाखा प्रमुख जैशीले बताए । कम्पनीले उच्च गतिको इन्टरनेट सेवाको मागलाई सम्बोधन गर्दै उपभोक्ताको माग अनुसार गुणस्तरीय, आकर्षक प्याकेज र अन्य सेवा प्रदायकको भन्दा विश्वसनीय तथा भरपर्दाे सेवा उपलब्ध गराउँदै आएको छ । छिटो, छरितो, सस्तो, किफायती र भरपर्दो सेवाको लागि सम्पूर्ण व्यवसाय, सामाजिक, सार्वजनिक तथा वित्तीय संस्थामा सेवा दिइरहेको र सबै उपभोक्ताहरु सन्तुष्ट गरेको उनको दाबी छ । फाइबरनेटले उपभोक्ताको समस्या र मागप्रति प्रतिबद्ध हुँदै समस्या देखिएको स्थानमा तुरुन्तै प्राविधिक खटाएर समस्या समाधन गर्ने गरेको उनको भनाइ छ । भुक्तानीका लागि पनि मोबाइल ई–सेवामार्फत् प्याकेज खरिद तथा भुक्तानीको सुविधा भएकाले कुनै झन्झट नहुने शाखा प्रमुख जैशीले बताए । हाल कम्पनीले नर्मल प्याकेज होम युजरहरुको लागि रु ३ हजार ५ सयमा रिचार्जसहित तीन महिनाको, रु ५ हजार ५ सयमा ६ महिनाको र रु ९ हजारमा एक वर्षको सेवा दिँदै आएको छ । अन्य विजनेस प्याकेजहरु ग्राहकको माग र आवश्यकता अनुसार दिँदै आएको उनले बताए । विजनेस प्याकेजमा १५० देखि ३५० एमबीपीएस सम्मको गतिको इन्टरनेट उपलब्ध गराउँदै आएको कम्पनीले जनाएको छ ।