कैलाली । कैलालीको मोहन्याल गाउँपालिकाका सामुदायिक वनहरूले आफ्ना उपभोक्ताहरूलाई विद्युत् मिटर वितरण गर्ने भएका छन् । पालिकाको वडा नम्बर १ मा रहेका तल्लापानी, चायभावर, बडिकाथाई, बसन्तगडा लगायतका गाउँका जनतालाई विद्युत् बाल्न वन समितिले मिटर वितरण गर्ने भएका हुन ।
वडा नम्बर १ मा रहेका कोपिला सामुदायिक वन, दानवीर सामुदायिक वन, नवप्रगतिशिल सामुदायिक वन, गतिशील सामुदायिक वन र शिवशक्ती सामुदायिक वनको सोमबार बसेको संयुक्त बैठकले प्रतिघर ३ हजार रुपैयाँ बराबरको बिद्युत् मिटर वितरण गर्ने निर्णय गरेको छ ।
स्थानीय जनप्रतिनिधि तथा सरोकारवालाहरुको जोड बलमा नेपाल विद्युत् प्राधिकरणले केही दिन अघि मात्रै सो क्षेत्रमा विद्युत् पु¥याएको छ । विद्युत् ट्रान्सफर्मरमा पुगी सकेको र मिटर वितरण तथा वाईरिङ्गका कामहरू मात्रै बाँकी रहेको वडा नम्बर १ का वडा अध्यक्ष प्रेम बहादुर बुढाले बताए ।
वडा अध्यक्ष बुढाका अनुसार वनको सो निर्णयबाट करिब पौने ३ यस घर परिवार लाभान्वित हुने छन् । लामो समय पछि गाउँमा विद्युत् पुग्नु र सामुदायिक वनहरूले जनअपेक्षा अनुसार सहयोगको घोषणा गर्नुले आम उपभोक्तामा खुसीयाली छाएको छ ।
