काठमाडौं । रुसी राष्ट्रपति भ्लादिमिर पुटिनका १० वर्षीय छोराको तस्बिर पहिलो पटक विश्वसामु सार्वजनिक भएको छ ।बेलायती समाचार संस्था डेली मेलले टेलिग्राम च्यानल भिसीएचे–युजीपियुलाई उद्धृत गर्दै दुई तस्बिरहरू सार्बजनिक गरेको हो ।यी दुवै तस्बिर पुटिनका छोरा इभान भ्लादिमिरोविच पुटिनको भएको दाबी गरिएको छ । जसकी आमाको नाम एलिना काबाएवा हो, जो एक जिमनास्टसमेत हुन्।
रिपोर्टका अनुसार इभान मानिसहरुसँग धेरै कम बोल्छन् र आफ्नो अधिकांश समय सुरक्षा गार्ड र शिक्षकहरुसँग बिताउँछन्। इभानको कान्छो भाइ भ्लादिमिर जूनियर पनि छन्, जो ४ वर्षका छन् तर अहिलेसम्म उनको कुनै तस्बिर सार्वजनिक भएको छैन। मिडिया रिपोर्टका अनुसार पुटिनका छोराको तस्बिर सार्वजनिक भएको यो पहिलो पटक हो । इभानको अनुहार पुटिनको जस्तै देखिन्छ।
पुटिनले आफूभन्दा ३० वर्ष कान्छी ओलम्पिक स्वर्ण पदक विजेता एलिना काबाएवासँग सम्बन्धमा रहेको पुष्टि गरेका छैनन् । तर, ५ महिनाअघि एक विज्ञप्तिमा उनले ‘मेरा साना छोराछोरीसँग’ चलचित्र हेर्ने गरेको भने उल्लेख गरेका थिए । आजसम्म पुटिनका छोराहरू सार्वजनिक रूपमा कहिल्यै देखिएका छैनन्, तिनीहरू प्रायः उच्च सुरक्षामा रहन्छन्।
एलिना र पुटिनको अफेयरको हल्ला बेलाबेलामा आउने गरेको थियो । जिमनास्टका रूपमा खेलकुदबाट सन्यास लिए पछि एलिना राजनीतिमा प्रवेश गरेकी थिइन। यति मात्र होइन, एलिना पुटिनको युनाइटेड रसिया पार्टीबाट सांसदसमेत बनिन् । एलिनाले पनि गायक बन्न पनि धेरै प्रयास गरिन तर सफल हुन सकिनन्।
सन २००७ देखि २०१४ सम्म एलिना राज्य ड्यूमा रूसी संसदको तल्लो सदनको एक उप थियो। यसबाहेक, उनी सेप्टेम्बर २०१४ मा रसियाको राष्ट्रिय मिडिया समूहको निर्देशक बोर्डको अध्यक्षको रूपमा नियुक्त भएकी थिइन्। पुटिनले उनीसँग नै बिबाह गरेको अनुमान गरिन्छ ।
खासमा यसअघि भ्लादिमिर पुटिनले १९८३ मा लुडमिलासँग विवाह गरेका थिए । उनका छोरीहरूको नाम मारिया र क्याट्रिना हो। पुटिन र ल्युडमिलाले सन् २०१३ मा सम्बन्धविच्छेद गरेका थिए तर त्यस पछि पुटिनले अहिलेसम्म विवाह गरेको जानकारी गराएका छैनन् ।
भ्लादिमिर पुटिनकी जेठी छोरी डा. मारिया भोरोन्टोभा क्रेमलिन अर्थात् रुसी राष्ट्रपतिको कार्यालयमा काम गर्छिन्। यद्यपि, आधिकारिक रूपमा उनी रुसको स्वास्थ्य मन्त्रालयको एन्डोक्रिनोलोजी विभागको राष्ट्रिय चिकित्सा अनुसन्धान केन्द्रका प्रमुख अनुसन्धानकर्ता हुन ।
त्यसैगरी, पुटिनकी कान्छी छोरी कटरिना टिखोनोभा पनि क्रेमलिनमा काम गर्छिन्। उनी रक्षा विभागमा प्राविधिक सहयोग सम्बन्धी कामको हेरचाह गर्छिन्। कट्रिनाले २०१५ मा रुसकी क्रिल शामलोवीसँग विवाह गरेकी थिइन् । समाचार अनुसार कट्रिनासँग १५ हजार करोडभन्दा बढीको सम्पत्ति रहेको छ । उनका श्रीमान् शामलोवी पनि रुसी बैंकमा सेयरधनी हुन् ।
खासमा राष्ट्रपति पुटिन धेरै गोप्य जीवन बिताउँछन्। उनले आफ्ना कति सन्तान छन् भन्ने कुरा सार्वजनिक रूपमा स्वीकार गरेका छैनन् । तर पुटिनका छोरीहरू उनको पूर्व पत्नी ल्युडमिला ओचेरेटनायाबाट धेरै प्रसिद्ध रहेको छन्। पुटिनका दुई छोरीहरू व्यवसायी मारिया भोरोन्टोभा र कटेरिना टिखोनोभा उच्च प्रोफाइल महिलाको रूपमा रहेका छन् ।
