तेल अहिव । इजरायलका प्रधानमन्त्री बेन्जामिन नेतन्याहुको स्वास्थ्य अचानक बिग्रिएपछि चिकित्सकले उनलाई आराम गर्न सल्लाह दिएका छन् । नेतान्याहुको कार्यालयले उनलाई खानामा ‘फुड पोइजन’ भएको जानकारी दिएको छ ।राति उनको स्वास्थ्य अचानक बिग्रन थालेपछि उनको आन्द्रा र शरीरमा पानीको कमी भएको चिकित्सकले बताएका छन् । हाल उनको उपचार भइरहेको छ र तरल पदार्थ खुवाइँदैछ। चिकित्सकको सल्लाहपछि उनले अब घरमै आराम गर्ने र त्यहीँबाट सरकारी काम सम्हाल्ने बताइएको छ ।
यसैबीच उनको स्वास्थ्य बिग्रिएपछि उनीविरुद्धको भ्रष्टाचार मुद्दाको सुनुवाइ पनि स्थगित भएको छ । यस मुद्दाको अर्को सुनुवाइ सेप्टेम्बर अघि हुने छैन, किनभने इजरायलका अदालतहरू गर्मीको बिदाका कारण बन्द छन्। यो मुद्दा सन् २०२० मा सुरु भएको थियो र अहिलेसम्म धेरै पटक यसको सुनुवाइ स्थगित भएको छ।
यसअघि नेतन्याहुले गाजा युद्ध र त्यसपछि लेबनानमा भएको द्वन्द्वको कारण सुनुवाइ स्थगित गरेका थिए। यस मामलामा, नेतान्याहु र उनकी पत्नी साराले २ लाख ६० हजार अमेरिकन डलर बराबरको महँगो उपहार प्राप्त गरेको आरोप छ। यसमा सिगार, गहना र शैम्पेन समावेश छ। बदलामा उनीमाथि कथित रूपमा राजनीतिक सहयोग गरेको आरोप छ।नेतान्याहु विगतमा धेरै स्वास्थ्य समस्याबाट ग्रस्त छन्। सन् २०२३ मा उनको मुटुमा पेसमेकर जडान गरिएको थियो । त्यसपछि डिसेम्बरमा प्रोस्टेटको शल्यक्रिया गर्नुपरेको थियो ।
