पर्वत । जिल्ला कारागार पर्वतबाट गत भदौ २४ गतेदेखि फरार भएका आठ जना कैदीबन्दी अझै कारागार नफर्किएकाले कारागार प्रशासनले एक साताभित्र फर्किन निर्देशन दिएको छ । कारागारबाट भागेका १९ मध्ये ११ जना फर्किए पनि आठ जना अझै सम्पर्कविहीन भएकाले फरार बन्दी खोजी तथा पक्राउ कार्यदलले सूचना जारी गरी एकसाताभित्र फर्किन निर्देशन दिएको हो ।
कार्यदलले आइतबार सूचना जारी गर्दै यही असोज २० गतेभित्र कारागार फर्किन सूचना जारी गरेको हो । कार्यदलले फरार कैदीबन्दीको नामावलीसहित सार्वजनिक सूचना जारी गरेको छ । तोकिएको समयसीमाभित्र नफर्किए कारागार ऐन तथा प्रचलित कानुनअनुसार कानुनी कारबाही गरिने चेतावनी दिइएको छ ।
बर्दिया घर भई कुश्मा नगरपालिका-७ खरेहा बस्ने जबरर्जस्ती करणी मद्दाका टेकबहादुर रानामगर, कर्तव्य ज्यान मुद्दामा कैद भुक्तान गर्दै आएका पैंँयू गाउँपालिका-३ बेउलीबासका खेम थापा, पर्वतको विहादी गाउँपालिका-६ का जबरर्जस्ती करणी मुद्दाका थुनुवा वसन्त विक, सहकारी ठगी मुद्दाका थुनुवा फलेवास नगरपालिका-२ का अनिल थापा, सोही मुद्दामा रहेका फलेवास नगरपालिका-३ का विष्णु तिवारी, विहादी-३ रानीपानी घर भई कुश्माबजार बस्ने राजु शर्मा सम्पर्कविहीन रहेका जिल्ला कारागारका जेलर नवीन सुवेदीले जानकारी दिनुभयो ।
गोरखाको अजिरकोट गाउँपालिक-५ घर भई जबरर्जस्ती करणी मुद्दामा कैद भुक्तान गर्दै आएका दीपक विक र जलजला गाउँपालिका-७ बाँस्कोटका जबरर्जस्ती करणी मुद्दाका थुनुवा समुद्र केसी अझैसम्म पनि सम्पर्कमा नआएका उहाँले उल्लेख गर्नुभयो । कार्यदलले सार्वजनिक सूचनामार्फत फरार कैदीहरूलाई देखेमा वा उनीहरूको बारेमा कुनै जानकारी भएमा तुरुन्त जानकारी गराउनसमेत आग्रह गरेको छ ।
कार्यदलले फरार व्यक्तिलाई लुकाउने, छिपाउने, वा सहयोग गर्ने कार्य गैरकानुनी हुने भन्दै त्यसप्रति पनि सचेत हुन आग्रह गर्दै सूचना दिने व्यक्तिको नाम र पहिचान गोप्य राखिने जनाएको छ । फरार कैदीबन्दी फर्काउन आवश्यक समन्वय र सहकार्यका लागि सबैसँग अनुरोध गरिएको प्रमुख जिल्ला अधिकारी हरिप्रसाद घिमिरेले बताउनुभयो ।
