कैलाली । कैलालीको बर्दगोरियामा आजदेखि सञ्चालन हुने सुदूरपश्चिम प्रदेश ‘मुख्यमन्त्री कप’ फुटबल प्रतियोगिता–२०८० को उद्घाटन हुँदैछ । बर्दगोरिया स्पोर्ट्स एण्ड इभेन्टस प्रालिको आयोजनामा पहिलो संस्करणको जिल्ला अन्तर्गतका अन्तरपालिका स्तरीय फुटबल प्रतियोगिता हुन लागेको हो ।
प्रतियोगिताको सुदूरपश्चिम प्रदेशका मुख्यमन्त्री कमलबहादुर शाहले उद्घाटन गर्नेछन् । स्थानीय क्षेत्रमा सामाजिक संस्थाको लगानीमा जिल्लामै पहिलो पटक ठूलो धनराशीको फुटबल प्रतियोगिता सञ्चालन हुन लागेको छ । प्रतियोगिताका लागि कुल ३ लाख ८६ हजार धनराशीको पुरस्कार तय गरिएको छ ।
प्रतियोगितामा जिल्लाका १३ वटा स्थानीय तहमध्ये १० पालिकाबाट १६ टिमको सहभागिता रहेको आयोजकले जनाएको छ । प्रतियोगिता यही मंसिर १३ गतेदेखि २१ गतेसम्म मुडाबजारको खेलमैदानमा सञ्चालन हुनेछ । जिल्लाव्यापी रुपमा सञ्चालन गरिएको उक्त फुटबल प्रतियोगिताको आयोजकले यसअघि खेल तालिकासमेत सार्वजनिक गरिसकेको छ ।
‘आत्मविश्वास, आत्मनिर्भर, स्थानीय पहिचान र स्वास्थ्यका लागि खेल” भन्ने मूल नारा बोकिएको प्रतियोगिताले यसक्षेत्रकै गरिमा बढाउने, खेलाडीको क्षमता विकास, जनशक्ति उत्पादन, स्थानीय व्यावसाय, पर्यटन र खेलकुदका क्षेत्रलाई प्रवर्द्धन गर्नमा टेवा पुग्ने आयोजकको अपेक्षा छ ।
प्रतियोगितामा बर्दगोरिया गाउँपालिकाबाट २ टिम, जोशीपुर गाउँपालिकाबाट १ टिम, लम्कीचुहा नगरपालिकाको ४ टिम, टीकापुर र घोडाघोडी नगरपालिकाबाट २/२ टिमको सहभागिता रहेको छ ।
त्यस्तै, भजनी, गौरीगंगा, गोदावरी नगरपालिकाबाट १/१ टिम र धनगढी उपमहानगरपालिकाको १ गरी १६ टिमको सहभागिता रहेको छ । प्रतियोगितामा सहभागिता नहुने पालिकामा जानकी, मोहन्याल र चुरे गाउँपालिका रहेका छन् । प्रतियोगिताको पहिलो उद्घाटन खेल बर्दगोरिया गाउँपालिकाको ‘बी’ र लम्कीचुहा नगरपालिकाको ब्वाइज युनियनबीच हुनेछ ।
प्रतियोगितामा सहभागि १६ टिमलाई ४ समूहमा विभाजन गरिएको छ । जसमा समूह ‘ए’ अन्तर्गत बर्दगोरिया ‘ए’ , लम्कीचुहा ‘बी’ एस फिफ्टिन, घोडाघोडी ‘बी’ र भजनी नगरपालिकाको टिम रहेका छन् ।
यसैगरी समूह ‘बी’ अन्तर्गत कैलारी गाउँपालिका, लम्कीचुहा क्याम्ब्रिज, धनगढी उपमहानगरपालिका र टीकापुर नगरपालिका ‘ए’ टिम सहभागि छन् । समूह ‘सि’ अन्तर्गत जोशीपुर गाउँपालिका, गोदावरी नगरपालिका , घोडाघोडी ‘ए’ र लम्कीचुहा राजिपुर रहेका छन् ।
खेल समूहको ‘डी’ मा बर्दगोरिया ‘बी’, लम्कीचुहा ब्वाइज युनियन, गौरीगंगा नगरपालिका र टीकापुर ‘बि’ छनोट भएका छन् । ‘पालिका स्तरबाट नै खेलाडीहरुको उत्पादन, पहिचान गरी उनीहरुको स्वास्थ्य, अनुशासन र लगनशीलतामा जोड दिँदै देशकै प्रतिनिधित्व गर्न प्रेरित गर्ने उद्देश्यले प्रतियोगिता आयोजना गरिएको हो ।’ अध्यक्ष मल्लले भने ।
उनले युवाहरुलाई खेलप्रति प्रेरित गर्न र कुलतबाट जोगाएर समाजप्रति जिम्मेवार र उत्तरदायी बनाउन खेलले भूमिका खेल्ने अपेक्षा गरिएको बताए । ‘देशको विकास र परिवर्तनको भूमिकामा रहेका युवाहरुलाई लागुपदार्थ, कुलत एवम् दुर्व्यसनीमा फसिरहेका छन् । समाजमा खेलको माध्यमबाट देशकै प्रतिनिधित्व हुने गरी अब्बल खेलाडी उत्पादन, उनीहरुको क्षमता विकास गर्न र सकारात्मक सन्देश प्रवाह गरी समाजको पहिचान गर्न प्रतियोगिताले योगदान पुर्याउने विश्वास र अपेक्षा छ ।’ उनले भने ।
प्रतियोगिताको विजेता टिमले २ लाख १ हजार र उपविजेता हुनेले १ लाख ५ हजार रुपैयाँ र ट्रफी पाउनेछन् । प्रतियोगितामा सर्वोत्कृष्ट खेलाडीलाई २० हजार र ट्रफी प्रदान गरिनेछ । अन्य विभिन्न विद्यातर्फ उत्कृष्ट गोलरक्षक, उत्कृष्ट गोलकर्ता, उत्कृष्ट डिफेन्डर र उदयमान खेलाडीले जनही १५ हजार रुपैयाँ र ट्रफी पाउनेछन् ।
प्रतियोगिताको सञ्चालन तथा व्यवस्थापनका लागि कुल २५ लाख रुपैयाँ खर्च हुने आयोजकको अनुमान छ । प्रतियोगिता सञ्चालनार्थ देश तथा विदेशमा रहेका विभिन्न व्यक्तिबाट सहयोग र पुरस्कार घोषणा भएको छ ।
प्रतियोगिताको सेमिफाइनल खेलभन्दा अघि कैलाली जिल्लाका महिला फुटबलतर्फ उत्कृष्ट दुईवटा टिमबीच मैत्रीपूर्ण खेल सञ्चालन हुने आयोजक बर्दगोरिया स्पोर्टस् एण्ड ईभेन्टस प्रालिका अध्यक्ष मल्लले बताए ।
