काठमाडौँ । अमेरिकी विदेशमन्त्री एन्टोनी ब्लिन्केन इजरायल पुगेका छन् । उनले आज दिउँसो इजरायली प्रधानमन्त्री बेन्जामिन नेतान्याहुसँग भेट गर्ने कार्यक्रम रहेको छ ।भेटमा गाजामा इजरायल र हमासबीचको युद्धविरामलाई लिएर दुई नेताबीच छलफल हुने मिडिया रिपोर्टमा बताइएको छ । साथै बन्धक रिहाइसम्बन्धी सम्झौताका विषयमा पनि छलफल हुनेछ ।
यस वार्ताको एउटा उद्देश्य इरान र इजरायलबीचको मध्यपूर्वमा बढ्दो तनाव कम गर्नु रहेको समेत उल्लेख गरिएको छ । यसअघि अगस्ट १५ र १६ मा दोहामा इजरायल, अमेरिका, कतार र इजिप्टका प्रतिनिधिबीच युद्धविरामका लागि वार्ता भएको थियो ।हमास भने यस वार्तामा सहभागी भएन । वार्तापछि अमेरिकी राष्ट्रपति जो बाइडेनले युद्धविराम सम्झौताको धेरै नजिक पुगेको बताएका थिए । यद्यपि हमासले युद्धविराम सम्झौतामा नयाँ शर्तहरू समावेश गरेकोमा विरोध गरेको छ ।
युद्धविराम सम्झौताको दोस्रो चरणको वार्ता यसै साता इजिप्टमा हुने भएको छ । यी वार्ताका लागि इजरायली प्रतिनिधिमण्डल आइतबार साँझ इजिप्ट प्रस्थान गरेको थियो । युद्धविरामका लागि जारी सबै प्रयासका बीच इजरायलले गाजामा गरेको कारबाहीमा कुनै कमी आएको छैन।आइतबार मात्र गाजामा इजरायली हमलामा २५ प्यालेस्टाइनीको मृत्यु भएको, जसमा एक महिला र उनका ६ बालबालिका पनि रहेको उल्लेख गरिएको छ ।
अर्कोतर्फ इजरायलले लेबनानमा पनि आक्रमण गरिरहेको छ । आइतबार दक्षिणी लेबनानमा इजरायलले गरेको आक्रमणमा परी १० जनाको मृत्यु भएको थियो । यस आक्रमणमा अन्य ५ जना घाइते भएका छन् । मृत्यु हुनेमा दुई बालबालिका पनि रहेका छन् ।आक्रमणमा मारिएका सबै सिरियाली नागरिक थिए । हिजबुल्लाहले गरेको रकेट आक्रमणमा दुई इजरायली सैनिक घाइते भएका छन् ।
गत महिना जुलाई ३१ मा इरानमा हमास प्रमुख हानियाहको मृत्यु भएपछि इजरायल र इरानबीच तनाव बढेको छ । हानिया इरानी राष्ट्रपति मसुद पजाकियानको सपथ ग्रहण समारोहमा सहभागी हुन तेहरान गएका थिए ।इरानले हनियाको मृत्युको लागि इजरायललाई दोष दिएको थियो। यसपछि इरानका सर्वोच्च नेता खामेनीले इजरायललाई हनियाको मृत्युको बदला लिन आग्रह गरेका थिए ।अर्कोतर्फ अमेरिकाले इजरायलको सुरक्षाका लागि मध्यपूर्वमा युद्धपोत, विमान वाहक र पनडुब्बी तैनाथ गरेको छ ।
इजरायल र हमासबीच जारी युद्धमा मारिने प्यालेस्टाइनीको संख्या ४० हजार नाघेको छ । गाजाको स्वास्थ्य मन्त्रालयले बिहीबार अगस्ट १५ मा यो जानकारी दिएको हो। गाजामा इजरायली हमलामा हालसम्म ९० हजारभन्दा बढी व्यक्ति घाइते भएका छन् ।
