काठमाडौँ । पाकिस्तानको पञ्जाब प्रान्तमा बढ्दो वायु प्रदूषणका कारण पार्क, चिडियाखाना, खेल मैदान र संग्रहालय जस्ता सार्वजनिक स्थानहरूमा मानिसहरूलाई प्रवेशमा प्रतिबन्ध लगाइएको छ ।पञ्जाबमा धुवाँ बढेसँगै वायुको गुणस्तर खतरनाक तहमा पुगेको छ । यसका साथै नोभेम्बर १७ सम्म सबै विद्यालय र कलेज बन्द गरिएको छ ।
लाहोरमा विहिबार सहरको वायु गुणस्तर सूचक पनि एक हजारको खतरनाक स्तर नाघेको थियो भने शनिबार बिहानसम्म पनि वायु गुणस्तर सूचक ७२३ रहेको छ । जनताको स्वास्थ्यलाई ध्यानमा राख्दै सरकारले सार्वजनिक स्थलमा अनावश्यक रूपमा बाहिर निस्कन निषेध गरेको छ ।
पञ्जाब सरकारले शुक्रबार जारी गरेको आदेशमा लाहोर, गुर्जनवाला, फैसलाबाद, मुल्तान, शेखुपुरा र अन्य १२ सहरहरूमा यो प्रतिबन्ध नोभेम्बर १७ सम्म लागू रहने बताइएको छ । सरकारले विद्यालय र कलेज बन्द गरिसकेको छ । लाहोर सहित १८ जिल्लाका सरकारी कर्मचारीहरुलाई घरबाटै काम गर्न भनिएको छ ।पञ्जाब सरकारले गत हप्ता मात्र धुवाँको बारेमा चिन्ता व्यक्त गरेको थियो । यसबाहेक लाहोरका धेरै क्षेत्रमा ग्रीन लकडाउन पनि लागू गरिएको थियो ।
पाकिस्तानको पञ्जाब सरकारले गत वर्ष डिसेम्बर २०२३ मा यूएईको सहयोगमा धुवाँ नियन्त्रण गर्न एउटा प्रयोग गरेको थियो । विश्वको सबैभन्दा प्रदूषित सहर मध्येको एक लाहोरमा कृत्रिम वर्षा गराइएको थियो । यसमा क्लाउड सिडिङ प्रयोगका कारण करिब १० प्रतिशत क्षेत्रमा पानी परेको थियो । तर यो विकल्पले धेरै दिन काम गरेन र २–३ दिनपछि फेरी वायु प्रदूषणको स्तर बढेको थियो ।पाकिस्तान सरकारले फेरि एक पटक कृत्रिम वर्षा दिने योजना बनाएको छ। तर लागत धेरै उच्च हुने अपेक्षा गरिएको छ ।
