कैलालीलाई अन्य ९ पहाडी जिल्ला सँग जोड्ने चिसापानी-कुइने सडकले स्थानी मोहन्यालबासी सहित सुर्खेत, डोटी, अछाम, दैलेख, कालिकोट लगायतका जिल्लाका मानिसको आवागमनको प्रमुख मार्ग हो । तर यो बाटो हरेक बर्खामा यात्रुहरुकालागी आँसुको बाटो बन्छ । पहिरोले बाटो थुन्छ, बस्तीको सम्पर्क टुट्छ । बिरामीले अस्पताल देख्न पाउँदैनन्, किसानको उपज बारीमै सड्छ।
नियम र प्रक्रियाको नाममा सरकार मौन बस्छ । बजेट र टेन्डरका फाइलहरू घुमिरहँदा जनताको सास्ती भने थपिइरहन्छ। जब राज्य संयन्त्र थाक्छ र सुस्त बन्छ, तब जनताले एउटा भरोसा खोज्छन्, सूर्य बहादुर थापा ।
उनी कैलाली-२ का जनताका सारथि हुन । सडक अवरुद्ध हुँदा उनको मन थामिँदैन । जनताको पीडा आफ्नो पीडा ठान्ने स्वभावले उनलाई अरूले जसरी बहाना खोज्दै मौन बस्न दिँदैन र त सुरु गर्छन् आफ्नै व्यक्तिगत लगानीमा एक्स्काभेटर र ट्याक्टरहरू परिचालनका काम । जनताका समस्यामा सरकारको मुख नताकी आफ्नै लगानीमा सडक मर्मतमा जुट्ने उनी यस क्षेत्रका लोकप्रिय हुन ।
उनले सडक मर्मतमा केवल मेसिन मात्र ल्याउदैनन सुस्ताएको समाजमा श्रमदानको ऊर्जा भर्छन् । उनको एउटै आह्वानमा सयौँ हातहरू सडक मर्मतमा जुट्छन् । यो केवल बाटो खोल्नु मात्र होइन, यो त विकासप्रतिको एउटा दरो सङ्कल्प हो । बर्खामा सामान्य सडक मर्मत गर्नु उनको वार्षिक कार्य तालिका जस्तै छ । उनले २०८० को बर्खामा त झन् उनले ८ लाख व्यक्तिगत खर्च गर्नु परेको बताए ।
”वास्तवमा यो सडक मर्मत गर्ने र नागरिकलाई सहजता दिने मुख्य जिम्मेवारी स्थानीय सरकारको हो। तर, हामीले सरकारको मुख मात्रै हेरेर बस्ने हो भने यो सडक बेलैमा मर्मत हुँदैन। जनताले पाउने सास्तीको त लेखाजोखा नै छैन। विशेष गरी तीजमा छोरीहरू माइत जान पाउँदैनन्, दसैँ–तिहारमा मान्छेहरू घर पुग्न सक्दैनन्। बिरामी, वृद्ध र गर्भवती महिलाहरू सडक नहुँदा थप जोखिममा पर्छन्। अरूले नगरेपछि कसैले त गर्नुपर्थ्यो। त्यसैले मैले आफ्नै लगानीमा भए पनि जनताको सहज आवागमनका लागि यो सडक खुलाउने गरेको छु ।” उनले भने
भदौ र असोज महिना नेपालीहरूको लागि उत्सवको समय हो । एकातिर महिलाहरूको महान् पर्व तीज र अर्कोतिर दसैँ–तिहारको रौनक हुन्छ । तर, बाटो बन्द हुँदा माइती जान हिँडेका चेलीबेटी र दसैँ मनाउन घर फर्कनेहरू बिच बाटोमै अलपत्र पर्ने गर्छन् । त्यो भन्दा पनि सडक अवरुद्ध हुँदा अस्पताल जानुपर्ने वृद्ध वृद्धा, गर्भवती महिला र आपत्कालीन बिरामीहरूले पाउने सास्ती बयान गरिसाधे छैन । स्थानीय सरकारको ढिलासुस्तीका कारण जनताले पाएको सास्ती सहन नसकेर आफू अघि सरेको थापा बताउँछन् ।
थापाले बर्सेनि गर्ने मर्मतको कामले हजारौँ यात्रुलाई सहजता थपेको छ । स्थानी भन्छन्,… “गफ गर्नेहरू धेरै छन्, तर सङ्कटको बेला पसिना बगाउने कमै हुन्छन् । जुन काम करोडौँको बजेट चलाउने सरकारले समयमा गर्न सक्दैन त्यो काम सूर्य थापाले एक्लै गरेर देखाइदिनु हुन्छ ।” स्थानीय इन्द्र भुलले भने । थापाको यो कार्यले स्थानीय तहको बजेट विनियोजन र परिचालनमाथि मात्र प्रश्न मात्रै उठाएको छैन, बरु जनसेवाका लागि पदमै पुग्नुपर्छ भन्ने छैन भन्ने सन्देश पनि दिएको छ।
