कैलाली । प्रथम मुख्यमन्त्री पालिकास्तरीय कैलाली जिल्लाव्यापी फुटबल प्रतियोगिताको उपाधिका लागि कैलालीको घोडाघोडी नगरपालिका र धनगढी उपमहानगरपालिकाको टीम आमनेसामने हुने भएका छन् ।

कैलालीको मुडामा जारी प्रतियोगितामा यी टोली आज फाइनल प्रवेश गरेका हुन् । आजको पहिलो सेमिफाइनलमा गौरीगङ्गा नगरपालिकालाई १-० को गोल अन्तरले हराउँदै धनगढी र दोस्रो सेमिफाइनलमा लम्कीचुहाको (बीएस- १५) लाई २-० को गोल अन्तरले हराउँदै घोडाघोडी नगरपालिकाको टोलीले फाइनलमा स्थान सुरक्षित गरेको हो । खेलको ४० औं मिनेटमा धनगढीका लागि रामसिंह रानाले गरेको गोल नै निर्णायक बन्यो । सो खेलमा रामसिंह नै म्यान अफ द म्याच बने ।

त्यस्तै दोस्रो सेमिफाइनलमा लम्कीचुहा (बीएस-१५) विरुद्ध घोडाघोडी नगरपालिकाका लागि १३औं मिनेटमा दीपकराज थापा र ४७औं मिनेटमा मीन बुढाले गोल गरे । सो खेलमा दीपकराज थापा म्यान अफ द म्याच घोषित भए ।

प्रतियोगिताको फाइनल मंसिर २१ गते हुनेछ । प्रतियोगिताको विजेताले २ लाख १ हजार नगद पुरस्कारसँगै ट्रफी, मेडल र प्रमाणपत्र पाउनेछ । उपविजेताले १ लाख ५ हजार नगदसहित ट्रफी, मेडल र प्रमाणपत्र पाउनेछ ।