बौनिया(कैलाली)। कैलालीको बर्दगोरिया गाउँपालिकामा कृषि ज्ञान केन्द्रको उद्घाटन गरिएको छ।
शुक्रबार एक कार्यक्रमकाबीच सुदुरपश्चिम प्रदेशका भूमि व्यवस्था, कृषि तथा सहकारी मन्त्री बिन्तादेवी चौधरीले केन्द्रको उद्घाटन गर्नुभयो।
प्रदेश सरकार मातहत रहने केन्द्रबाट कृषि तथा पशुपालनको लागि आवश्यक प्राविधिक ज्ञान, तालिम र सुचना प्रसार लगायतका सेवा प्रवाह गरिने जनाइएको छ।
केन्द्रको उद्घाटन गर्दै मन्त्री चौधरीले स्थानीय तहमा रहेका किसानहरुलाई घरमै सेवा दिने उदेश्यका साथ केन्द्र संचालनमा ल्याईएको बताउनुभयो। उहाँले प्रदेशको राजधानी धनगढीदेखि टाढाको दुरीमा रहेका किसानहरूलाई सहज रुपले सेवादिने, कृषि पेशामा आकर्षक बढाउने र रोजगारी सृजना गर्ने उदेश्यका साथ सेवा विस्तार गरिएको बताउनुभयो। उहाँले किसानका समस्या समाधान गर्न स्थापित केन्द्रलाई कृषक मैत्री बनाउन सबैसँग हातेमालो गरेर अगाडि बढ्नुपर्ने बताउनुभयो।
मन्त्री चौधरीले स्थानीय तहमा बजेटको कार्यान्वय र सङ्घीयता कार्यान्वयनमा टेवा पुर्याउन र सेवाका लागि प्रदेशको राजधानी धनगढीनै पुग्नुपर्ने वाध्यतालाई मध्यनजर गरि सेवा विस्तार गरिएको बताउनुभयो। चौधरीले कृषिमा उच्च प्रविधिको प्रयोग बढाउन सरकार प्रयत्नरत रहेको समेत बताउनुभयो।
कार्यक्रममा कृषि राज्यमन्त्री मानबहादुर सुनारले दुरदराजमा रहेका किसानको पिडालाई ध्यानमाराखी सेवाकेन्द्रका रूपमा यसको विस्तार गरिएको बताउनुभयो। उहाँले संघीयताको मर्म अनुरुपको सेवा प्रदान गर्न र सुदुरकै बढी जनघन्त्व भएको बर्दगोरिया क्षेत्रको विकासमा टेवा पुर्याउने विश्वास गर्नुभयो। उहाँले सीमित स्रोत र साधनबाट उच्चतम फाइदा लिन कृषिको व्यवसायीकरणका साथ अगाडि बढ्नुपर्ने बताउनुभयो।
उहाँले आफ्नै देशमा केही गरौँ र अरुलाई पनि सकेको रोजगारी सिर्जना गरौ भनी कृषिमा अग्रसरहरुलाई सरकारले नै कृषि सम्बन्धि विविध कार्यक्रम ल्याएको भन्दै सेवालिन आग्रह गर्नुभयो।
कार्यक्रममा बोल्ने अन्य बक्ताहरुले यहाँका कुनाकन्दरामा रहेका किसानलाई समान रुपमा सेवा दिन प्रत्याभूत दिलाउन सक्नुपर्नेमा जोड दिए। उनीहरूले ज्ञान केन्द्र कृषि क्षेत्रको विविधतालाई समेट्न सक्नुपर्ने बताए।
सेवाविस्तार संगै बर्दगोरियासहितका ८ स्थानीय तहका किसानलाई कृषिसेवा लिनमा सहजता हुनेछ भने धनगढी पुग्नुपर्ने बाध्यताको अन्त्य हुनेछ। यसैगरी कृषि पेशामा लगाव, कृषक र उधमिको विकास र समृद्धिमा मद्दत पुग्ने अपेक्षा गरिएको छ।
