नवलपरासी २९ जेठ । पश्चिम नवलपरासीको सरावल गाउँपालिकाद्वारा आगामी आर्थिक वर्षका लागि निर्माण गरिने नीति तथा कार्यक्रमका लागि स्थानीयवासीसँग सुझाव संकलन गरेको छ ।
आगामी आर्थिक वर्ष २०८० / ०८१ का लागि गाउँसभाले ल्याउने नीति, कार्यक्रम तथा बजेटबारे सरोकारवालाहरूसँग नीति कार्यक्रम तथा बजेट सम्बन्धि राय सुझाव लिएको गाउँपालिका अध्यक्ष सुखाडी प्रसाद चौधरीले बताएका हुन ।
गाउँपालिकाबासीको अपेक्षा धेरै तर पालिकाको स्रोतसाधन सीमित भएकोले सोच अनुसारको काम गर्न समस्या रहेको अध्यक्ष चौधरीको भनाई थियो । आगामी वर्षको नीति, कार्यक्रम तथा बजेटमा कृषि, शिक्षा, स्वास्थ्य लगायतका क्षेत्रलाई महत्व दिदै दीर्घकालिन हितका योजना बनाउने उहाँले उल्लेख गर्नुभयो । आम नागरिकको भावनालाई समेटेर नै पालिकाले नीति तथा कार्यक्रम ल्याउने उहाँको भनाई थियो । गाउँपालिकाबासीबाट प्राप्त महत्वपूर्ण राय ,सुझावहरुलाई प्राथमिकताको आधारमा समावेश गर्दै अघि बढ्ने चौधरीले प्रतिबद्धता व्यक्त गर्नुभयो ।
गाउँपालिका उपाध्यक्ष बासमति हरिजनले आगामी वर्षको नीति तथा कार्यक्रममा पालिकाबासीबाट प्राप्त सुझावलाई नै आधार मानेर नीति तथा कार्यक्रम बनाउने बताउनुभयो । उहाँले पालिकाको आवश्यकतालाई मध्यनजर गर्दै संघ र प्रदेश सरकारसँगको सहकार्यमा बजेट निर्धारण गरिने जानकारी दिनुभयो ।
त्यस्तै गाउँपालिका प्रमुख प्रशासकीय अधिकृत दुर्गा पौडेलले समुदायको अपेक्षा अनुसारका नीति तथा कार्यक्रम ल्याउनका लागि नै राय सुझाव संकलन गरिएको बताउनुभयो । पालिकाबासीसँग सामाजिक सञ्जाल, वेभसाईट, इमेल तथा भौतिक उपस्थितिबाट समेत सुझाव संकलन गरिएको र महत्वपूर्ण सुझावहरु प्राप्त भएको पौडेलले बताउनुभयो ।
संघ र प्रदेशबाट प्राप्त हुने बजेट, पालिकाको आन्तरिक स्रोत, आवधिक योजना, नेपाल सरकारका नीति तथा कार्यक्रम, दीगो विकासका आधार, राष्ट्रिय नीतिहरु, स्थानीय आवश्यकता लगायतका आधारमा योजनाहरु प्राथमिकीकरण गरिने प्रमुख प्रशासकीय अधिकृत पौडेलले जानकारी दिनुभएको हो ।
कार्यक्रममा सहभागि सरोकारवालाहरुले कृषि, शिक्षा, स्वास्थ्य, सहकारी, खानेपानी, सडक पूर्वाधार, समावेशीकरण, भ्रष्टचार निर्मुलीकरण, सञ्चार, वन, वातावरण, पर्यटन लगायतका क्षेत्रमा दीर्घकालिन प्रभाव पर्ने खालका योजनाहरु ल्याउन सुझाव दिएका थिए ।
