फुङ्लिङ (ताप्लेजुङ), ताप्लेजुङमा प्रतिनिधिसभा निर्वाचनअन्तर्गत प्रत्यक्षतर्फ प्राप्त मतको तुलनामा समानुपातिकतर्फ नेपाली कांग्रेस, नेकपा (एमाले) र नेपाली कम्युनिस्ट पार्टीले कम मत प्राप्त गरेका छन् ।मुख्य निर्वाचन अधिकृतको कार्यालयले सार्वजनिक गरेको तथ्याङ्कअनुसार नेकपा (एमाले) का उम्मेदवार क्षितिज थेवे १३ हजार ९६२ मत प्राप्त गर्दै विजयी हुनुभएको थियो ।
तर समानुपातिकतर्फ एमालेले प्रत्यक्षतर्फ प्राप्त गरेको मतभन्दा दुई हजार ६१७ मत कम अर्थात् ११ हजार ३४५ मत मात्रै पाएको छ । थेवेका निकटतम प्रतिद्वन्द्वी नेपाली कांग्रेसका उम्मेदवार गजेन्द्रप्रसाद तुम्याहाङले प्रत्यक्षतर्फ ११ हजार ७११ मत प्राप्त गर्नुभएको थियो । कांग्रेसले समानुपातिकतर्फ प्रत्यक्षतर्फको मतभन्दा दुई हजार ६८ मत कम अर्थात् नौ हजार ६४३ मत प्राप्त गरेको छ ।
यसैगरी नेपाली कम्युनिस्ट पार्टीका उम्मेदवार खेलप्रसाद बुढाक्षेत्रीले प्रत्यक्षतर्फ ६ हजार ६७५ मत प्राप्त गरेका थियो । उक्त पार्टीले समानुपातिकतर्फ पाँच हजार २१४ मत मात्रै प्राप्त गरेको छ । जुन प्रत्यक्षतर्फ उम्मेदवारले पाएको मतभन्दा एकहजार ५६९ मत कम हो । यता श्रम संस्कृति पार्टीका उम्मेदवार सन्तोष राईले प्रत्यक्षतर्फ पाँच हजार २०९ मत प्राप्त गर्नुभएको थियो । समानुपातिकतर्फ सो पार्टीले प्रत्यक्षभन्दा तीन हजार ४८९ मत बढी अर्थात् कूल आठ हजार ६९८ मत प्राप्त गरेको छ ।
राष्ट्रिय स्वतन्त्र पार्टीका उम्मेदवार वीरेन्द्र श्रेष्ठले प्रत्यक्षतर्फ पाएको मतभन्दा समानुपातिकतर्फ दुई हजार ३४० मत बढी प्राप्त गर्नुभएको छ । मुख्य निर्वाचन अधिकृतको कार्यालयका अनुसार रास्वपाले समानुपातिकतर्फ छ हजार ४९५ मत प्राप्त गरेको छ ।
सङ्घीय लोकतान्त्रिक राष्ट्रिय मञ्चका उम्मेदवार मुक्साम लावुङले प्रत्यक्षतर्फ २११ मत प्राप्त गर्नुभएको थियो भने समानुपातिकतर्फ मञ्चले ५१० मत प्राप्त गरेको छ । यो प्रत्यक्षभन्दा २८९ मत बढी हो । राष्ट्रिय प्रजातन्त्र पार्टी ८८ का उम्मेदवार इन्द्रप्रसाद थापाले प्रत्यक्षतर्फ १८५ मत प्राप्त गर्नुभएको थियो । तर समानुपातिकतर्फ राप्रपाले ४१५ मत प्राप्त गरेको छ । जुन प्रत्यक्षभन्दा २३० मत बढी हो ।
नेपाल कम्युनिष्ट पार्टी (माओवादी) का उम्मेदवार नरपति पौडेलले समानुपातिकभन्दा प्रत्यक्षतर्फ बढी मत प्राप्त गर्नुभएको छ । उहाँले प्रत्यक्षतर्फ १५५ मत ल्याउनुभएको थियो भने समानुपातिकतर्फ उक्त पार्टीले ११९ मत मात्रै प्राप्त गरेको छ । जुन ३६ मत कम हो । जनता समाजवादी पार्टीका उम्मेदवार अरुण लेछर्बो लिम्बूले प्रत्यक्षतर्फ १४१ मत प्राप्त गर्नुभएको थियो । तर उहाँको पार्टीले समानुपातिकतर्फ प्रत्यक्षभन्दा २५ मत कम अर्थात् ११६ मत प्राप्त गरेको छ ।राष्ट्रिय समाचार समिति (रासस)
