कैलाली । कैलालीको मोहन्याल गाउँपालिकामा ऐलानी जग्गा नापजाँच सुरु भएको छ । भूमिहीन सुकुमबासी, दलित र अव्यवस्थित बसोबासीलाई जमिनको स्वामित्व दिलाउनका लागि ऐलानी जग्गा नापजाँच सुरु भएको हो । औपचारिक रुपमा जग्गाको नापी र अभिलेखीकरण कार्य सुरु भएपछि लालपुर्जा पाइने आशामा यहाँका स्थानीय उत्साहित छन् ।
आइतबार मोहन्याल गाउँपालिकाको वडा नम्बर १ बाट ऐलानी जग्गा नापजाँच सुरु गरिएको वडाले जनाएको छ । भूमिहीन सुकुमबासी, दलित र अव्यवस्थित बसोबासीलाई जमिनको स्वामित्व दिलाउनका लागि ऐलानी जग्गा नापजाँचको काम सुरु गरिएको वडाध्यक्ष प्रेमबहादुर बुढाले बताए । मोहन्याल गाउँपालिकाले राष्ट्रिय भूमि आयोग र नापी कार्यालयसँगको समन्वयमा जग्गा नापजाँच गरिरहेको उनले जानकारी दिए ।
