काठमाण्डौं । नेपाल कम्युनिष्ट पार्टी माओवादी केन्द्र (क्रान्तिकारी) र ऋषि कट्टेल नेतृत्वको नेपाल कम्युनिष्ट पार्टी बिच नेपाली कम्युनिष्ट आन्दोलनको इतिहास, वर्तमान कार्यभार र चुनौतिहरुबारे गम्भिरतापूर्वक छलफल भएको छ । उक्त छलफल आज बिहान काठमाण्डौको हात्तिगौंडामा भएको हो ।
करिब डेढ घण्टा लामो छलफलमा माओवादी केन्द्र (क्रान्तिकारी) का महासचिव लोकराज जैसी (लोकेश) र नेपाल कम्युनिष्ट पार्टीका अध्यक्ष ऋषि कट्टेल सहभागि थिए । त्यसक्रममा माओवादी केन्द्र (क्रान्तिकारी) का केन्द्रीय सदस्य तथा पार्टी निकटको प्रेस सेन्टर नेपालका केन्द्रीय अध्यक्ष मनराज कठायतको समेत उपस्थिति रहेको थियो ।
छलफलको क्रममा दुबै पार्टीका शिर्ष नेताहरुबिच जनसत्ताँका प्राप्तिका लागी क्रान्तिकारी कम्युनिष्टहरुको एकता र संगठित आन्दोलनमा जोड दिने सहमती समेत भएको छ । साथै कम्युनिष्ट आन्दोलनको इतिहासदेखि वर्तमानसम्मका घटनाक्रमहरुको वृहत समिक्षा गर्दै, कमिकमजोरीहरुको पहिचान गरेर सुदृढ योजना सहित वृहत कम्युनिष्ट पार्टी निमार्णको दिशामा अघि बढ्नुपर्नेमा नेताहरुबिच समान मत बनेको छ ।
भेटघाटको क्रममा नेकपाका अध्यक्ष ऋषि कट्टेलले माओवादी केन्द्र (क्रान्तिकारी) ले चलाएको सिङ्गो कम्युनिष्ट आन्दोलनको अवस्था र एकताको अपरिहार्यताबारे वहस अत्यन्त सान्दर्भिक रहेको भन्दै त्यसले नेपाली कम्युनिष्ट आन्दोलनको निरन्तरतामा महत्वपूर्ण पहलकदमी लिन सक्ने विश्वास व्यक्त गरे । उनले युवाहरुले यसरी वृहत कम्युनिष्ट आन्दोलनको तयारीमा जुटौं भन्दै पुराना, बुढापाका कम्युनिष्ट नेताहरुलाई आग्रह गर्ने कुरा आफैमा अर्थपूर्ण र महान रहेको भन्दै त्यस्तो प्रकारको वहसले क्रान्तिकारी विचारको रक्षा र विकासमा योगदान पुग्ने भन्दै धन्यवाद समेत व्यक्त गरेका थिए ।
उनले कम्युनिष्ट एकताको लागि पहिलो आधार वर्तमान दलालीकरणमा मस्त राज्यसँत्तालाई ध्वस्त पारेर जनवादी सत्ताँ ल्याउनका लागि त्यसको वस्तुवादी, ठोस कार्यक्रमको तर्जुमा र कार्यान्वयनमा जुट्ने कुरा हुन सक्ने धारणा राखे । अहिले बैद्य, विप्लव, आहुती र आफ्नो पार्टी बिच रणनीतिक लक्ष्य पुरागर्नका लागि रणनीतिक मोर्चा निर्माण गरेको भएपनि त्यसले अपेक्षा अनुसारको गति लिन नसकेको भन्दै उनले त्यसलाई अझ सुदृढ गर्दै संयुक्त मोर्चा, संघर्षमा सहकार्य सहित एकतामा पुग्ने आधारका रुपमा विकास गर्न आवश्यक रहेको औल्याए ।
उनले अहिलेसम्मका क्रान्तिकारी आन्दोलनको व्याख्या गर्दै भने, ‘हामीले कम्युनिष्ट क्रान्ति कसैले गरेनौं, सबैले राजनीतिक आन्दोलन मात्र गर्यौ, अब आधारभूत वर्गजनसमूदायको नेतृत्व र सहभागितामा वर्ग संघर्षको आधार बनाउँदै अघिबढौं, क्रान्ति सम्भव छ ।’ माओवादी केन्द्र (क्रान्तिकारी) सँगको छलफलले क्रान्तिकारी कम्युनिष्टहरुलाई एकता, रुपान्तरण र संघर्षको संन्देश दिएको भन्दै उनले छलफललाई पुनः निरन्तरता दिनुपर्ने र भेटवार्ता दोहोर्याउनुपर्ने धारणा समेत राखेका थिए ।
उक्त क्रममा नेकपा माओवादी केन्द्र (क्रान्तिकारी) का महासचिव लोकराज जैसी (लोकेश) ले कम्युनिष्ट शक्तिको विभाजनले नेपाली क्रान्तिकारी आन्दोलनलाई प्रभावित पारेको निष्कर्षसहित पछिल्लो पटक आफ्नो पार्टीले सबै देशभक्त, जनवादी, प्रगतिशिल कम्युनिष्ट पार्टी, समूह र जनसमूदायबिच वहस चलाइरहेको बताएका थिए ।
महासचिव लोकेशले कम्युनिष्ट शक्तिहरु संघर्षमा बलियो मोर्चाबन्दी गर्दै दृर्घकालिन लक्ष्यलाई केन्द्रमा राखेर वृहत एकताको प्रकृयामा जोडिन आफ्नो पार्टीले सबैलाई अपिल गर्दै कम्युनिष्ट एकताबारे छलफल, वहसमा जुटेको विषय सविस्तार प्रकाश पारेका थिए ।
उनले कम्युनिष्ट इतिहासको विरासतमा टेकेर आन्दोलनको महान जिम्मेवारी पुरा गर्न सबै कम्युनिष्ट शक्तिहरु एक भएर अघि बढ्नुको विकल्प आफुले नदेखेको भन्दै त्यसका लागि अग्रज तथा पुराना सबै कम्यनिष्ट नेताहरुलाई पहल गर्न आग्रह समेत गर्दै आएको बताए ।
महासचिव लोकेश ले भने–‘कम्युनिष्ट आन्दोलनबाट मात्र जनसत्ताँ स्थापना गर्न सकिन्छ, हामी जुटौं, एकताको विकल्प छैन ।’ कम्युनिष्ट विभाजनले यथास्थितिवादी, पश्चगामी शक्तिहरु हावी हुँदै गएको र त्यसले क्रान्तिकारी आन्दोलनबाट प्राप्त भएका राजनीतिक उपलब्धीहरु समेत गुम्न सक्ने खतरा बढेको भन्दै उनले वर्तमान अवस्थामा देशको सामाजिक राजनीतिक वस्तस्थितिको अध्ययनसहित वस्तुवादी कार्यदिशा, कार्यक्रम, संगठन निमार्ण गर्दै निर्णायक संघर्षमा ध्यान दिनुपर्ने बताए ।
भेटघाटको क्रममा दुबै पार्टीका शिर्ष नेताहरुले अर्को पटक थप छलफलका लागि जुट्ने सहमति सहित राष्ट्रियता, जनतन्त्र र जनजिविका सँग सम्बन्धीत साझा मुद्दामा सँगै संघर्षको मोर्चामा जुट्ने प्रतिवद्धता समेत जाहेर गरेका थिए । माओवादी केन्द्र (क्रान्तिकारी) ले सामाजिक सञ्जाल फेसबुक मार्फत भेटघाटको विषयमा जानकारी गराउँदै आफुहरु निरन्तर कम्युनिष्ट एकताको पक्षमा वहस, छलफलमा जुटिरहेको बताएको छ ।
