नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले दे शको मुल समस्या सरकारको अस्थिरता नभएको बताउनुभएको छ ।
बिहीवार पार्टी केन्द्रिय कार्यालय आलोकनगरमा आयोजित एक कार्यक्रममा बोल्दै अध्यक्ष नेपालले यस्तो दाबी गर्नुभएको हो । उहाँले आफूहरु ९ महिना सरकारमा रहँदा उदाहरण पेश गरेको भन्दै सो अवधिमा गफ नभइ काम गरेर देखाएको जिकिर गर्नुभयो । उहाँले नौ महिनाको सरकारले देशमा तरंगा पैदा गरेको बताउनु भयो । उहाँले आफ्नो गाउँ, आफैँ बनाउँदेखि नौ सको अभियान, वृद्धभत्ता प्रदान, ६० हजार सुकुम्वासी परिवारलाई जग्गा बाँड्ने लगायतका उदाहरणीय काम गरेर देखाएको बताउनु भयो । उहाँले काम गर्नेका लागि नौ महिना नै काफी हुने बताउनु भयो । मध्यपहाडी राजमार्ग र तराईको हुलाकी राजमार्ग आफू नेतृत्वको सरकारले बनाउन शुरु गरेको दाबी गर्नुभयो ।
उहाँले भन्नुभयो, ‘हाम्रो देशको समस्याको मुल कारण के हो, त्यहाँबाट जानुपर्छ । मुल कारण भनेको सरकारको अस्थिरता होइन । ९ महिना हामी सरकारमा हुँदाखेरी (नौ महिना) उदाहरण पेश गरेका छौँ । गफ होइन । काम गरेर देखाएका छौँ, नौ महिना भित्र । सारा देशमा तरंग पैदा गरिदियौँ । आफ्नो गाउँ, आफैँ बनाउँ भन्नेदेखि लिएर, नौ सको अभियानदेखि लिएर, वृद्ध भत्ताको कुरादेखि लिएर । सुकुम्वासीलाई जग्गा बाँड्ने, ६० हजार परिवारलाई जग्गा बाँड्ने काम गर्नेदेखि लिएर, बिहानीले दिउँसो कस्तो हुन्छ भन्नेकुराको संकेत गर्दछ । गर्नेले छोटो समयमा गर्छ । एक जनाले मलाई भन्नुभयो, हामी मध्यपहाडी राज्यमा हिँडे, त्यहाँको इन्जिनियरलाई सोधेँ, यो कसको पालामा भयो ? उनीहरुले भनेः माधव नेपाल प्रधानमन्त्री भएको पालामा भएको हो । हाम्राले प्रचार गर्न चाहँदैनन् वा थाहा नै पाउँदैनन् । मान्छे काँग्रेस पार्टीका रहेछन्, तपाईंले यति शानदार बाटो बनाउनु भएछ, त्यहाँ म गाडी लिएर जाँदा त कस्तो आनन्द भयो । अर्को एक जना तराईको हुलाकी राजमार्गमा जानुभएको रहेछ । त्यहाँ सोध्दा उनीहरुले भने, माधव नेपाल प्रधानमन्त्री हुँदा नै भारतको प्रधानमन्त्रीसँग हुलाकी राजमार्गको निम्ति आर्थिक सम्झौता र निर्माणको काम अघि बढ्यो । यो बाटो हेर्नुस् । शानदार बाटो ।’
अध्यक्ष नेपालले मुलुकमा कसैले काम गरेको भए आफूहरुले नै गरेको दाबी गर्नुभयो । मुलुकमा परिवर्तन पनि आफूहरुले नै गरेको र देशमा गणतन्त्र पनि आफूहरुले नै ल्याएको बताउनु भयो । सो समयमा देशमा गणतन्त्र नआउने कुरा गर्नेहरु पार्टीभित्रै रहेको भन्दै उनीहरुलाई आफूहरुले चासो नदिएको बताउनु भयो । राजतन्त्रका बिरुद्धमा जान काँग्रेसले खुट्टा कमाएको र अरु पार्टीले पनि हिम्मत नगर्दा आफूहरुले नै आन्दोलन गरेर हटाएको बताउनु भयो । उहाँले परिवर्तनलाई साकार बनाउने काममा आफूहरु सफल भएको जिकिर गर्नुभयो ।
उहाँले भन्नुभयो, ‘हामीले शानका साथ भन्नुपर्छ, यो मुलुकमा काम कसैले गरेको छ भने हामीले गरेका छौँ । परिवर्तन कसैले गरेको छ भने हामीले गरेका छौँ । गणतन्त्र कसैले ल्याएको छ भने हामीले ल्याएका छौँ । गणतन्त्र आउँदैन नेपालमा भन्नेहरु यही पार्टीभित्र थिए । गीत गाएर मात्रै हिँडेका होइनन् । बिरोध गरेर हिँडेका थिए । उत्साह बढाउने होइन, घटाउने काम गरिरहेका थिए । हामीले टेरेनौँ । वास्ता गरेनौँ । हामीले भन्यौँ, हिँड्ने हिँडिरहन्छन्, हिम्मत नभएकाहरु थन्किरहेका हुन्छन्, बसिरहन्छन् । बस्नेलाई बस्न देउ । हिँड्नेलाई जान देउ । हामी हिँडिरह्यौँ । राजतन्त्रका बिरुद्धमा अरु पार्टीले पनि हिम्मत गरेनन् । काँग्रेसको पनि खुट्टा काम्यो । उसले पनि बेबी किङ भन्न थाल्यो । तर हामीले एक्लै आँट ग¥यौँ । र परिवर्तनलाई साकार पा¥यौँ ।’अध्यक्ष नेपालले अहिले नेपालको राजनीतिको समस्या भ्रष्टाचार रहेको बताउनु भयो । भ्रष्टाचार अन्त्य नगरेसम्म मन्त्रीको संख्या घटाएर केही नहुने बताउनु भयो ।
